Gå til sidens hovedinnhold

Torje er klar for FK Haugesund: – Det blir nok blautkake på klubbhuset i morgon

Vi visste det var sannsynleg. No er det stadfesta. Torje Naustdal flyttar til Haugesund og blir eliteseriespelar. Det er bra for Florø Fotball også.

For abonnentar

Torje Naustdal har vore på utgåande kontrakt i Strømmen IF, og fleire klubbar har vore interessert i å hente midtbaneankeret frå Florø. No er det stadfesta at han tek turen til FK Haugesund for å spele i eliteserien.

På klubbhuset ved stadion er dagleg leiar Kim Solheim strålande fornøgd med at nok ein florøgut og tidlegare spelar no skal spele på høgaste nasjonale nivå.

– Vi må få ønske Torje all mogleg lykke til i karrieren. Dette er jækla stas, det blir nok feiring med blautkake på klubbhuset i morgon, seier ein stolt Kim Solheim.

Ein del av kaka

Den daglege leiaren i Florø Fotball er stolt av at dei har vore med på å utvikle ein eliteseriespelar. At han no signerer for FK Haugesund før kontrakten med Strømmen går ut, gjer at litt av overgangssummen kjem Florø til gode.

– Vi er ein del av overgangen, og får ein del av kaka. Vi er godt fornøgd med den økonomiske biten, stadfestar Solheim.

– Kva tenker du om at trenaren til Strømmen, Ole Martin Nesselquist, sa at Naustdal var ein middelmåtig andredivisjonsspelar då dei henta han til klubben?

– Det for stå for hans rekning. Strømmen skal ha skryt for at dei har utvikla han til ein toppspelar, men dei hadde ikkje klart det om ikkje det var eit godt grunnlag der frå før. Først og fremst så var Torje sjølv sinnssjukt motivert for å bli profesjonell fotballspelar, å kunne leve av å spele fotball. Nå kjem han til Eliteserien og har oppnådd akkurat det.

Takkar trenarane

– Først og fremst er det veldig kjekt at ein så kul klubb som FK Haugesund gir meg denne sjansen. Eg skal sjølvsagt gjere alt for å vise meg fortent til tilliten dei viser meg og kan ikkje si anna enn at eg gleder meg veldig, seier hovudpersonen sjølv til heimesida til FK Haugesund., og han har ikkje gløymt kor han kjem ifrå.

– Eg er veldig takknemleg for alle trenere eg har hatt opp gjennom årene – både i Florø og sidan i Strømmen det siste halvtanna året.

Naustdal seier at han trur han skal passe godt inn i ein klubb han forbind med samhald og råskap. Ikkje minst ser han fram til å få gras under knottane igjen. Kunstgras blir ikkje det same.

– Ikkje minst ser eg fram til å spele på gras. Eg elskar gras, avsluttar Naustdal.

Naustdal har signert ein kontrakt som er på 4,5 år. Ifølge Romerikes Blad er overgangssummen på meir enn ein halv million kroner. Kor mykje av den summen Florø skal ha er ikkje kjend.

Overgangsvindauget i Norge opnar 1. august. Torje Naustdal blir verande i Strømmen-drakta fram til den datoen.

Les også

Blir truleg FK Haugesund-spelar: – Ei kjempesignering

Les også

Strømmen er førebudd på livet utan Naustdal: – For 14 månader sidan var Torje ein middelmåtig andredivisjonsspelar

Les også

Torje bygde seg treningsstudio heime i hagen

Kommentarer til denne saken