Gå til sidens hovedinnhold

Sterke namn til Havblikk i juni

Sondre Lerche og Death By Unga Bunga er mellom dei åtte artistane som står på scena på festivalen Havblikk på Fanøy siste helga i juni.

For abonnentar

Om du ikkje er mellom dei heldige hundre som alt har kjøpt billett til todagarsfestivalen Havblikk 21 25. og 26. juni, så har du kanskje likevel ein sjanse til å kjøpe billett når festivalen nærmar seg. Det vil gjenopninga av samfunnet ut i juni vise. Dei 100 billettane arrangørane sette som grense grunna pandemien, blei utselt på få dagar i starten av mars.

Kanskje ein av grunnane til det var rosen Havblikk fekk av kulturminister Abid Raja i nyttårstalen sin. Men den viktigaste grunnen er nok artistane som står på scena og festivalstemninga på den idylliske øya. Det er området ved Batalden Ishus som er ramma kring festivalen.

Godt nettverk gir gode artistar

- Det er sjølvsagt stort for oss å kunne gi publikum Sondre Lerche, men eg gler meg like mykje til alle dei andre artistane, seier Johan J. Bakken som arrangerer festivalen saman med kompis Erling Karstensen.

- Vi får heldigvis god dugnadshjelp frå det flotte bygdemiljøet, og lokale sponsorar bidreg med nødvendige kroner, fortel Bakken. Han jobbar for Oslo musikk- og kulturskole, og har ein mastergrad i rytmisk musikk. Han trakterer tangentane i to band, og har opparbeidd seg eit godt nettverk i musikkmiljøet.

- Det er jo litt av grunnen til at vi kan presentere åtte artistar i år. Det blir nok litt ekstra fokus på Sondre Lerche. Lerche blei kåra til «Årets viktigaste artist» av Dagens Næringsliv tidlegare i år, og 70 norske musikkjournalistar kåra låten «Why Would I Let You Go» til årets beste låt i fjor, fortel Bakken.

- Og så har vi arenarock-gutta i Death By Unga Bunga, då. Dei spelte den kulaste streamingkonserten i 2020 med Once Upon A Time In Deadwood City, og dei forstyrra nok fredagstacoen til mange med sitt show på Lindmo, smiler Bakken.

Drøymer om 1000

Havblikk starta i det små i 2016, profesjonaliserte seg gjennom eit samarbeid med BRAK (kompetansesenter for musikkbransjen i Vestland) i 2018, og har som mål å vekse vidare.

- I utgangspunktet har festivalområdet vårt plass til knapt 350 publikummarar. Men fram i tid draumar vi om 1000 på den gamle skuleplassen på Fanøy. I tillegg ser vi for oss intimkonsertar i selskapslokale på Ishuset, utandørskonsertar til dømes ved grotta Omnen på Litle-Batalden, og andre kunst- og kulturuttrykk, utbroderer Bakken.

- Målet vårt er å få eit rykte i bransjen som ein profesjonell festivalarrangør og ein heilårsarrangør av mindre konsertar, for slik å komme inn på turneplanar til store og små artistar. Og vi meiner vi er godt i gang med å skape oss eit slikt rykte, smiler 27-åringen.

Om folk melder seg på nyheitsbrevet til Havblikk via facebooksida deira, så vil dei motta fortløpane informasjon om nye billettar som eventuelt blir lagt ut for sal til årets festival.

Dette er dei 8 artistane på Havblikk i år:

Sondre Lerche - Death By Unga Bunga

Great News - Misty Coast

Beharie - Din Moris

VIAN - William & Chris

Festivalside: www.havblikk.net

Konsertstad: Batalden Ishus – www.bataldenishus.no

Kommentarer til denne saken