Gå til sidens hovedinnhold

Stad-ordføraren om smitteutbrotet: – Det har vore jobb døgnet rundt

Med unntak av nokre få enkelttilfelle her og der, omtala ordførar Alfred Bjørlo Stad som ein «koronafri kommune». Det var fram til førre veke.

For abonnentar
(Firda)

– Det har ikkje vore ei god kjensle, seier Alfred Bjørlo, ordførar i Stad kommune.

Den siste veka har vore ekstremt travel for han og dei andre i kommunen, etter at ein tilsett ved Eid kyrkje fekk påvist korona etter eit besøk i Bergen.

Tidlegare under pandemien har ikkje Stad hatt større utbrot av koronasmitte, men heller enkelttilfelle som har vore lette å avgrense.

– Før eller seinare måtte det komme eit større utbrot her også. Vi meiner sjølv vi har hatt god kontroll hittil, men det er noko anna når det først smell slik som dette.

Lange dagar på jobb

Det eine smittetilfellet ved Eid kyrkje kan sporast tilbake til 40 andre koronatilfelle i fleire kommunar i Sogn og Fjordane. Bjørlo estimerer at ein stad mellom 150–200 personar sit i karantene.

I Stad har elleve personar fått påvist smitte, medan 80 personar er i karantene. 270 personar er testa, noko som svarar til nesten tre prosent av innbyggarane i kommunen.

Bjørlo fortel at det gode samarbeidet mellom kommunane og Helse Førde har vore heilt avgjerande for at smittesporinga har gått så raskt.

– Gjennom heile pandemien har vi etablert eit veldig godt forhold og gode rutinar mellom oss. Det har vore ein kjempefordel i denne samanhengen og det har gått ganske saumlaust, seier Bjørlo.

Han legg ikkje skjul på at det har vore ei ekstra krevjande veke på jobb som ordførar.

– Denne veka har det vore jobb døgnet rundt. Kommuneoverlegen plar å sende første oppdatering klokka 06.00 om morgonen og siste klokka 00 om kvelden. Det har vore lange dagar, seier han.

– Openheit har vore viktig

Etter laurdagens testar har det kome eitt nytt tilfelle, men no begynner Stad-ordføraren å sjå lys i enden av tunnelen.

– Dei siste seks tilfella vi har hatt har vore personar som allereie har vore i karantene fordi dei har vore nærkontaktar. No har vi kontroll på situasjonen, men det kan nok komme eit tilfelle eller to til, det ser eg ikkje bort ifrå, seier han.

Bjørlo forstår at innbyggarane i kommunen har kjent at pandemien no har kome nærare med dette utbrotet og han har ønska å vere så open som mogleg.

– Eg trur det har vore veldig viktig. Det er klart at mange er urolege og har mange spørsmål. Derfor har vi vore raskt ute med informasjon så fort vi veit noko.

Han skryt også over at kyrkja har vore open om situasjonen.

– Eg har vore veldig glad for at dei også har vore opne. Det er mykje betre at folk får vite at ting er som dei er, enn at folk går rundt og lurer eller spreier rykte, seier han.

Les også

Ein tilsett smitta heile kyrkjestaben: – Som lyn frå klar himmel

Les også

Ein barnehagetilsett i Kinn er koronasmitta: – Ein del tilsette og barn i karantene

Les også

To smitta i Sunnfjord – heng saman med utbrotet i Stad

Kommentarer til denne saken