Småjentene til FSK, som vart kretsmeistrar innandørs i vinter, viser at dei også er best under open himmel. No har dei runda av vårsesongen på toppen av tabellen med ein kamp mindre spelt og 54-7 i målskilnad!
Ut frå tabellen er det FSK, Førde og Jølster som vil knive om seriemeisterskapen denne sesongen. Berre to poeng skil dei tre laga, men FSK har ein kamp mindre spelt enn dei to konkurrentane. Og småjentene verkar å vere tente på fleire meisterskap. Sjølv om det er skuleferie trenar dei to gongar i veka. Det synest med andre ord at det er svært moro å sparke fotball. Samtidig held dei vedlike kondisjon og teknikk til haustsesongen tek til mot tredjelaget til Jølster i midten av august. Før den tid skal dei til Norway-Cup kor Åram IL, Øvrevoll BK og Holmestrand IF er motstandarar.
– Held dei fram å spele det gode spelet dei har vist her heime i vårsesongen, trur eg dei kan nå sluttspelet, seier Jørgen Agledal i foreldreutvalet. I tillegg til småjentene stiller Sportsklubben med lag i gute og smågute klassen i Norway Cup. I slutten av juli er det dermed ein delegasjon på 50 spelarar pluss leiarar, trenarar og foreldre frå FSK som set seg på bussen.
27. juli 08.00 set dei kurs mot Oslo og Norway Cup. Og ein skal ikkje vere overraska om jentene går vidare. For dei jentene FSK har, er gode og klubben skulle ønskt at fleire jenter ville vere med. – Vi treng fleire jenter slik at vi kan få stabla eit damelag på beina. Det treng vi her i byen, seier Agledal og oppmoder alle jenter som ønskjer å spele organisert fotball å bli med på treningane i haust.
