Dei har rett nok vore i full drift sidan første september, og levert tapas, møtemat og selskapsmat, men det er sjølve butikken florøværingane har venta på. Steinar Svardal & Co hadde ein plan om å starte opp i september. Det fekk dei ikkje til, men no er meste det endeleg klart. Onsdag denne veka opnar dei dørene på «Sjøkanten Fisk og Delikatesser» for første gong.

Alt på stell

– Det meste er på stell no. Lokala er så godt som klare, alle formalitetane i orden, og alle papir og løyve på plass.. Onsdag klokka 12.00 opnar vi.

Det fortel Ida Therese Ellingsund Redal medan Steinar Svardal leverer ut softis til dei som vil ha. Champagnekorken er allereie spretta, og stemninga i lokalet må kunne karakteriserast som langt opp på god-skalaen. Vi må presisere at champagnen er alkoholfri. Trass i alt er det før lunsjtid på ein måndag, det kan ikkje ta heilt av. Dessutan er det framleis nok å gjere.

Det er framleis handverkarar som held på med siste finish i lokalet, men onsdag føremiddag skal alt vere klappa og klart.

– Vi gler oss vanvittig til å kome i gang no. Det har vore utsett altfor lenge, seier Elise Aagesdatter.

Varer som ingen andre har

– Kva kan vi kundane gle oss til på onsdag?

– Kva er det ikkje å gle seg til, ler Ida Therese., før ho og Elise startar på oppramsinga.

– Det blir varer som du ikkje får tak i nokon annan plass i byen. Varer frå «Broken Taco», «Drit forbanna» og «Jentene på tunet», mellom anna.

– Det blir honning frå Stryn og rakfisk frå Noraker Gård i Valdres. Mykje ost, spekemat, kjøtt, fisk og varm mat.

– Og våre signaturfiskekaker, som vi lager sjølv. Resten må folk nesten berre kome inn og sjå på onsdag. Vi kan ikkje røpe alt, seier dei to.

Ikkje kafé i starten

Utanfor butikken har det kome opp ein terrasse, der ein kan kose seg med noko godt både på tallerkenen og i glaset når vêret legg til rette for det. Men akkurat dette må kundane uansett vente litt med å ta i bruk. Den første tida blir det ikkje høve til å sitte ned i lokala og ete. Dette er på grunn av koronasituasjonen. Dei ønsker ikkje at det skal vere for mykje folk i butikken samtidig.

– Den første veka blir det ikkje mogleg å sitte ned hos oss. På grunn av koronasituasjonen kan vi ikkje har for mange folk i lokalet på same tid, og vi ventar jo at det kjem ein del kundar innom for å sjå og handle. Difor har vi bestemt oss for at vi opnar kafédelen litt seinare, seier Ida Therese.