Gå til sidens hovedinnhold

Sigrid og venninnene sakna eit tilbod i Florø. Då tok dei saka i eigne hender

Sigrid Hopen Eliasson (25) flytta tilbake til Florø i slutten av 2019 etter å ha studert. Saknet etter å spele fotball meldte seg fort. Etter eit initiativ på Facebook, var det tysdag 19 jenter på trening i storhallen.

For abonnentar

– Eg blei ganske overraska over responsen, for å vere ærleg. Det var veldig kjekt at så mange dukka opp. Eg spelte fotball her i Florø i 2014 då eg flytta for å studere. Eg er ikkje heilt sikker, men trur ikkje det har vore noko tilbod for damefotball i byen etter 2015, fortel Sigrid.

Saman med venninnene Henriette Jagedal (25) og Madelen Hopen (25) bestemte dei for å sjekke om det var interesse i byen for å starte med treningar. På den kjente Facebook-sida «du veit du er frå Florø når …» la Sigrid ut eit innlegg og informerte at dei som var interesserte, kunne møte opp for ei hyggeleg fotballtrening i storhallen.


– Vi vil ha med så mange som mogleg, så det er ikkje noko store krav. Men det er nok ein fordel om du har spelt litt fotball før i alle fall. Det var nokon som hadde spelt fotball nyleg, og nokon som ikkje har hatt på seg fotballskoa på fleire år.

Sigrid har vore i kontakt med Florø Fotball og har fått treningstid i hallen tysdagar frå 20.30–22.00. Dei har også fått låne utstyr frå klubben.

– Eg trur det har mykje å seie at vi får fram eit damelag her i Florø. Det vil også gjere at unge jenter har noko å sjå fram mot. I tillegg er det kjekt for oss som flytter tilbake til byen. Det er eit godt fritidstilbod og ein sosialt fellesskap. Eg fekk inntrykk av at ein del har sakna fotballen.

Sigrid begynte å tenke på ideen då ho flytta heim, men kort tid etterpå kom koronaen og sette ein stoppar for prosjektet. No håpar ho at dei kan jobbe mot å delta i turneringar og kanskje seriespel i framtida.

– Eg håper vi kan få ei stabil treningsgruppe. Serie og turneringar blir ikkje før på våren uansett, så vi har litt tid på oss. Vi har oppretta ei Facebook-gruppe kor vi allereie er 30 medlemmer. Og det er sjølvsagt plass til fleire, avsluttar ho.

Kommentarer til denne saken