Gå til sidens hovedinnhold

Høgre-fylkesleiaren: – Kjempeuheldig, om regjeringa ryk

Artikkelen er over 3 år gammel

POLITIKK: Høgres fylkesleiar Vidar Grønnevik er lite glad for at justisminister Sylvi Listhaug (Frp) har sett heile regjeringsprosjektet i fare med Facebook-åtferda si.

For abonnentar

– Det er uheldig at vi har kome i ein slik situasjon. Eg er spent på utfallet, seier Grønnevik til Firda måndag ettermiddag. På det tidspunktet hadde KrF-leiar Knut Arild Hareide allereie markert at Høgre ikkje kunne ta for gitt at regjeringa ville bli redda av KrF.

Høgres stortingsgruppe skal ha hastemøte tysdag morgon, før mistillitssaka toppar seg i stortingssalen i møtet som tek til klokka 10. Sentralstyret i Høgre kjem saman tysdag ettermiddag. På det tidspunkt vil det vere avklara om Høgre då framleis leiar ei regjering eller er på veg over i opposisjon.

Håpar på løysing

– Eg håpar at dette blir løyst på ein god måte. Det vil vere kjempeuheldig, om regjeringa ryk, seier Grønnevik.

– Kven meiner du har ansvaret? Er det Listhaug som provoserte for mykje, eller opposisjonen som dreg saka for langt?

– Eg vil ikkje fordele skuld. Men det er uheldig at ein har kome i den situasjonen ein har.

– Kva tykkjer du om det justisministeren la ut på Facebook?

– Det er vel ei type melding ingen bør drive med på sosiale medium, anten ein har den eine eller andre rolla. Slike meldingar tilfører ikkje debatten noko særleg.

Tankevekkar

– I dette tilfellet kan faktisk Listhaugs aktivitet på Facebook føre til at Høgres og Erna Solbergs regjeringsprosjekt går i vasken. Kva tenkjer du om det?

– Vi må ta inn over oss måten samfunnet utviklar seg på, og korleis sosiale medium verkar i dagen kvardag. Det burde vere ein tankevekkar for veldig mange, seier Grønnevik, og legg til:

– Eg er like spent som alle andre på utfallet i denne saka.

Kommentarer til denne saken