Dobbel dose med Vamp på Svanøy

Vamp og arrangørane på Svanøy trør til med ekstrakonsert søndag 23. juli.

Vamp og arrangørane på Svanøy trør til med ekstrakonsert søndag 23. juli. Foto:

Av
Artikkelen er over 2 år gammel

Set opp ekstrakonsert etter rekordsal.

DEL

Han brukte fem dagar på å selje ut 400 Vamp-billettar til låvekonserten på Svanøy Hovedgård laurdag 22. juli. No har Johan Trygve Solheim og Vamp blitt samde om å setje opp ein ekstrakonsert dagen etterpå.

Mange var skuffa

- Eg hadde aldri trudd trøkket skulle bli så stort. Det hadde ikkje Øyvind Staveland og Vamp heller. Vi opplevde ei mengd med fortvila og skuffa fans som kontakta oss i vekene som følgde, via epost, telefon og på nettsidene våre og forsøkte å skaffe seg billettar. Då kontakta eg Vamp, og dei var positive til ein ekstrakonsert, fortel Johan Trygve Solheim.

Les også: Nærmare Tir na' noir kjem du ikkje

Lunsj med bandet

Dermed blir det Vampkonsert i låven ved Hovedgården også på søndagen, med konsertstart klokka 17. Tidlegare på dagen skal artistane på båttur for å sjå Svanøy og øygarden frå sjøsida, før det blir bede inn til stor lunsj på Norsk Hjortesenter.

- Her blir det ope for alle som ønskjer å få ein matbit, få oppleve Norsk Hjortesenter - og kanskje få slått av ein prat med artistane, seier Johan Trygve Solheim.

Til søndagskonserten blir det rabatterte billettar til barn under 12 år, og tidspunkta for konserten gjer det mogleg å ta ordinær rutebåt til og frå konserten.

Snart byggjestart

Sidan Firdaposten omtalte låveprosjektet sist, er det no avklart at det blir Allbygg som skal stå for ombyggingsarbeidet.

- Jobben med å bygge om låven startar 18. april, og det blir ein langspurt derfrå til konsertdatoen for å bli ferdige. Men det har Allbygg lova skal gå bra, seier Solheim.

Billettane til søndagskonserten med Vamp er no lagt ut på ticketco.no.

Artikkeltags