Samferdslepolitikarar til Florø

Stortingets Transport- og kommunikasjonskomité er på synfaring i Møre og Romsdal og Sogn og Fjordane 27. – 31. oktober.

29. - 31. oktober har komiteen fullt program i Sogn og Fjordane, med føredrag, diskusjonar og presentasjonar frå lokale politikarar og aktørar.

Komiteen kjem til Florø torsdag ettermiddag, og eit av hovudtema då er kystvegen og Bremangersambandet.

Kystveg i Florø

I Florø skal komiteen delta på møte i bystyresalen på Flora samfunnshus . Ordførar Bente Frøyen Steindal skal snakke om kystvegen og samarbeidet mellom kystkommunane i denne saka.

Så skal Bremanger-ordførar Kåre Olav Svarstad snakke om Bremangersambandet , som ein viktig del av samanbindingsvegen mellom kystbyane.

Avinor skal orientere om flyplassane i Sogn og Fjordane, og Kystverket om ny innsegling til Gunhildvågen i Florø, ny losstasjon i Florø og tømming av Welheim.

Eivind Hjellum og Hallgeir Helland skal snakke om utfordringar ved Flora hamn , før komiteen får sjansen til å stille spørsmål til dei ulike presentasjonane.

Til Askvoll

Om kvelden er det middag på Haavebua, og morgonen etter går turen med ekspressbåten til Askvoll. Der skal det handle om Dalsfjordbrua og ferje. Fjord1 Fylkesbaatane skal snakke om konkurranseutsetting, og Fjaler-ordførar Arve Helle om Dalsfjordbrua.

Tett program

Før komiteen kjem til Florø, har dei lagt bak seg eit intensivt program. Onsdag 29. skal komiteen diskutere Stad Skipstunnel i Vanylven.

Dagtid torsdag er det møte pål Alexandra hotell i Loen med mange ulike aktørar. Her skal fylkesordførar Nils R. Sandal fortelle om utfordringar for fylket , Fylkesmann Oddvar Flæte om kommunikasjonar, og ordførar i Stryn, Nils P. Støyva og ordførar i Eid og leiar i Nordfjord regionråd Sonja Edvardsen om utfordringar i samferdslesektoren i Nordfjord.

Flora-politikar og leiar i Nasjonal rassikringsgruppe Åshild Kjelsnes skal snakke om ras i fylket, i tillegg til innlegg frå Nordfjord hamn, Statens Vegvesen, NHO Sogn og Fjordane , Jernbaneverket og Fylkesmannen i Sogn og Fjordane .

Tett program

Etter lunsj torsdag går turen vidare til Tine Meierier på Byrkjelo, og deretter er det møte med Gaular- og Gloppen-ordførarne Jenny Følling og Anders Ryssdal.

Så går turen vidare med buss til Florø. På bussen skal Jølster-ordførar Gerd Dvergsdal og Førde-ordførar Nils Gjerland orientere.

Profilerte politikarar

Stortingets Transport- og kommunikasjonskomité består av 12 stortingspolitikarar, men det er ein redusert komité som no er på besøk i fylket. Per Sandberg frå FrP er leiar i komiteen, med Borghild Tenden (V) som nestleiar og Torstein Rudihagen (Ap) som andre nestleiar.

Komiteen sine arbeidsområde er innanlands transport, post, telekommunikasjonar, elektronisk kommunikasjon og oppgåver under Kystverket.

Les meir om:
• Lokalnytt