Jakob (15) fekk si første golfkølle som eittåring – etter det har han vore hekta.

GOLF: Då Jakob Stavang Stubhaug frå Florø var fire, kjøpte familien leilegheit i Jølster - for der var den beste golfbana i fylket. No stiller femtenåringen i senior-NM i golf.

DEL

– Eg har spelt golf så lenge eg kan hugse. Eg fekk mi første kølle av far min, då var eg berre eitt år gamal, det fortel Jakob Stavang Stubhaug.

Han brukar nesten kvar helg på golfen. Enten er han på turneringar i utland og innland, eller så reiser han til Jølster for å trene.

15-åringen har dei siste åra imponert mange med golfspelinga si. På torsdag går Senior NM av stabelen i, då er florøværingen klar til å måle seg mot Norges beste.

– Eg har ikkje spelt på mitt beste så langt i sommar, men eg har trua på at NM vert kjekt. Det er på mange måtar sesongens høgdepunkt, seier Jakob til Firda. Han er på plass i Stavanger og gjer seg klar til NM som startar på torsdag.

Kjøpte leilegheit på Jølster for å spele golf

Ein kan på mange måtar sei at familien til Jakob er ein skikkeleg golffamilie. Heilt sidan han var liten har golf vore ein stor del av familien.

– Eg har vakse opp med golf, eg har spelt mykje med både far og mor mi. Dei er begge gode i golf, seier Jakob.

Faren, Magne Stubhaug, fortel til Firda at golfen var mykje av grunnen til at dei valde å kjøpe ei fritidsleilegheit på Jølster.

– Vi kjøpte vel leilegheita for cirka 12 år sidan, den har vore i familien stort sett heile Jakob sitt liv. Vi fann raskt ut at det vart mykje styr å køyre fram og tilbake frå Jølster så ofte. Sidan Jølster er den beste plassen i Sunnfjord å spele golf på, er vi der ofte. Det vart derfor lettast å få ein fast plass å vere på medan vi er der.

Jakob sjølv seier han ikkje huskar mykje frå tida før dei kjøpte leilegheita på Jølster.

– Eg huskar lite av tida før vi fekk leilegheita der. No reise eg til Jølster for å spele golf kvar helg eg har moglegheita. Det vil stort sett seie kvar helg eg ikkje er på turneringar.

Andre mann i rekka til ungdoms-OL

Tidlegare i august var Jakob på junior-NM på Stiklestad. Turneringa avgjorde kven som fekk moglegheita til å representere Noreg i ungdoms-OL i Argentina til hausten. Jakob enda på andre plass i turneringa, bak Bård Bjørnevik Skogen frå Sveio.

– Uttaket var litt tungt, eg spelte ikkje på midt beste. Men Bård som kom øvst er god. Og han er eit år eldre enn meg. Om han vert skada eller liknande før OL, vert det eg som tar turen til Argentina, seier Jakob til Firda.

Trenar aleine

Heime i Florø brukar Jakob mykje tid aleine. Golfmiljøet i Florø er ikkje veldig stort, og Jakob vedkjenner at det vert kjedeleg til tider.

– Samstundes trur eg det hjelp meg å halde fokus på treninga. Om vi er mange gutar som trenar i lag kan det fort bli mykje tøys, så det er ikkje berre dumt å trene aleine.

Når Jakob reiser til Jølster får han derimot trent med utøvarar som er opp mot hans eige nivå.

– På Jølster trenar eg av og til med to andre utøvarar, Andreas Aarseth og Marcus Gamborg (21). Markus skal vere med på NM som begynner på torsdag, det er kjekt å trene med desse, seier Jakob før han må ut og få inn ei siste økt før NM går av stabelen.

Artikkeltags