På programmet laurdag i Bremanger kyrkje står mykje fengande og vakker klassisk musikk.
– Dette er nydeleg musikk som er lærerik og utfordrande å jobbe med. Det er verkeleg noko å strekke seg etter for songarane, som legg ned ein kjempejobb med å terpe og repetere stemmene sine. Ofte er det slik at amatørar i starten synest det er håplaust og vanskeleg, men når dei har lært stemmene sine og høyrer dei i samklang med dei andre og med orkester, så blir det stort og flott, fortel dirigent for Bremanger Kammerkor, Jarle Grotle.
Dei to kora har med seg distriksmusikarane og to proffe solistar som vil setje ein ekstra spiss på konserprogrammet. Bass/baryton Bjørn Gisle Seter og sopranen Synnøve Nordvik er solistar i kantatene og framfører også ariar av Bach og Händel.
Dirigentar er Jarle Grotle og Dorothee Raschwitz. Begge spelar og i orkesteret, Jarle piano og orgel, medan Dorothee spelar cembalo.
Musikken og musikarane
Programmet inneheld barokkmusikk, mellom anna to kantater av Buxtehude, ein komponist som blir rekna som ein av dei viktigaste i den tidlege barokken. Han vart fødd i 1637 og levde dei første åra i Danmark, fram til han fekk stillinga som organist i den tyske byen Lübeck i 1668, der han vart verande til han døydde i 1707. Han er også ein viktig læremeister for Johann Sebastian Bach som kom i generasjonen etter( f. 1685). På same måte som Bach var Buxtehude «gløymt» fram til midten av 1800-talet. Buxtehude skreiv ca. 120 kantater eller liknande verk. Dei er gjennomgåande enklare og kortare enn Bachs kantater.
I tillegg får vi høyre koret synge den svært vakre «Cantique de Jean Racine» av Gabriel Fauré (framført på norsk), John Rutters «The Lord bless you», «Wachet auf, ruft uns die stimme» av J. S. Bach og «If Ye love me» av den engelske rennesanseskomponisten Thomas Tallis. Konserten inneheld dermed eit breidt spekter av musikkhistoria.
Orkester tel seks flotte musikarar, ei blanding av distriktsmusikarar, frilans-musikarar og amatørmusikarar. Desse er Otto Ose, fiolin, Henri Eftevand, fiolin, Simona Fraas Johnsen, bratsj, Ingvild Haavet Bjørnson, bratsj, Henrik Silfverhielm, cello, Jakob Leiv Kroken, kontrabass.