Gå til sidens hovedinnhold

Hotella merkar norgesferie-effekten: – Det har snudd!

FLORØ: Frå tomme rom i mars, går det no veldig bra for hotella både i Florø og Måløy.

For abonnentar

Ein telefon til dei to hotella i Florø avslører at sommar ser atskilleg betre ut enn dei frykta då koronastenginga tok knekken på all optimisme i mars. Direktør Tone Øren på Comfort Victoria Hotell seier det ser veldig bra ut hos dei, og Jonas Alander ved Quality Hotel Florø seier seg einig.

Losna då skulane opna

– Det var veldig labert i mars og april. Men då skulane opna igjen, losna liksom alt. Då byrja folk å reise igjen og forretningstrafikken tok seg opp igjen, seier Øren og legg til at aktiviteten generelt har vore høg etterpå.

–Her er masse folk i byen! Vi merkar at her er mykje turistar, og mykje individuell trafikk.

– Merkar de noko til at dette er det store norgesferie-året?

– Ja. Vi hadde også ein veldig bra sommar i fjor også på inviduell turisme, og vi har bra belegg no, og vi ser at det er familiar som kjem midt i veka.

Øren peikar også på at initiativet til Byen vår Florø med gågate på det som skulle ha vore den tradisjonelle Himmel og Hav-laurdagen blei svært vellykka.

– Då var det rimeleg fantastisk her på palmekysten!

Øren meiner vi har mykje å vise fram, men at det skortar litt på marknadsføringa.

– Det får vi jobbe med, for det har vi kanskje ikkje vore så flinke til, seier ho og fortel at hotellet prøver å selje inn til dømes øyane overfor turistane.

– Vi har mange gjestar som reiser ut i øygarden vår og synest det er heilt fantastisk der ute.

Ho er så langt svært nøgd med sesongen etter at samfunnet opna opp igjen.

– Vi sat her i vinter og ikkje visste kva som ville skje – det har heldigvis snudd!

Ulike typar gjestar på Quality

Jonas Alander fortel om ein veldig god start på året, men at det var «som å trekke ut proppen i badekaret» då koronastenginga kom.

– Vi måtte permittere store delar av arbeidsstokken, men vi har halde ope heile tida.

Også Alander beskriv at belegget har vore godt frå og med mai månad.

– Det er litt todelt – losji-biten er veldig bra og så er det ein reduksjon i kurs/konferanse-aktiviteten. Alle store arrangement er jo blitt kansellert, så den store nedgangen har vi hatt på mat og drikke.

For tida har dei også ein del turistar.

– Vi har bra med gjestar og det er veldig hyggeleg. Nordic Choice har ein sommarkampanje som har vore stor suksess der ein får ein rimeleg inngangsbillett til overnatting, så det er litt av nøkkelen; å ha gode tilbod. Turistane er viktige no.

Alander fortel at hotellet har ein miks av ulike typar gjestar.

– Det går føre seg ting fleire stader; på basen, vi har offshoretrafikken, folk som jobbar med vindkraft, og altså turistar. Og til saman utgjer det gode tal for oss.

Alander har også tru på at juli blir bra, og fortel at august ser lovande ut.

– Så er det meir usikkert frå hausten av. Vi er avhengige av at konferansemarknaden tek seg opp igjen og at folk byrjar å møtast igjen. medstorre arr. Vi er framleis litt forsiktige. Men vi registrerer at vi får ein god sommar og det er vi veldig takksame for.

Fullbooka i Måløy

Hjå Sandra Christine Refvik ved Thon Hotel Måløy (tidlegare Kaptein Linges Hotel), har dei hatt fullt belegg i snart to månader allereie.

– Sommaren ser svært bra ut. Vi har fått mykje bookingar både frå familiar og eldre par. I tillegg har næringskundane også byrja å røre på seg igjen. Ein litt spesiell trend er at vi får svært mange syklande gjester i år, fortel Sandra.

– Kva seier gjestene dine om kvifor dei har valt seg Måløy?

– Det verkar som mange kjem hit for aller første gongen. Dei har høyrt om Kråkenes fyr, og dei vil til Refviksanden og dei skal sjå Kannesteinen. Det er i stor grad ferierande frå Sør-Norge som kjem, mange austlendingar. Vi har få besøkjande frå dei nordlege fylka, seier Refvik til Firdaposten.

Kommentarer til denne saken