Gå til sidens hovedinnhold

Gonçalo Pereira: – Vi skal vere konkurransedyktige, og kjempe om tre poeng i kvar kamp

Florø Fotball måtte vente lenge på trenaren sin. Men den som ventar på noko godt, ventar kanskje ikkje fåfengt?

For abonnentar

– Keep the ball moving, smell det over kunstgrasbana på Florø Stadion.

A-laget er i gang med treninga, og den portugisiske trenaren Gonçalo Pereira er endeleg på plass på treningsfeltet. Meldingane til spelarane kjem på engelsk, og Pereira vil ha større intensitet og meir fart på ballen.

- Hald ballen i bevegelse, ropar han. Og han får det slik han vil.

– Bra! Bra! No likar eg det!

Ikkje nokon feriekoloni

Pereira fekk jobben i januar, men grunna koronarestriksjonane fekk han ikkje lov til å reise til Norge før i starten av mai. No er det om lag tre veker sidan han kom til Florø. Han fortel at det er godt å vere i full sving på treningsfeltet, og endeleg få møte spelarane i levande live.

Å vere fotballtrenar på video er ikkje heilt ideelt.

– Det er den lengste oppkøyringa nokosinne. Det var lenge å vente på å få kome til Florø, men eg er fotballtrenar. Eg må berre respektere det styresmaktene og dei som er ekspertar på folkehelse bestemmer, og tilpasse meg det. Som fotballtrenar må du kunne tilpasse deg, elles er du ferdig. Men det er godt å endeleg vere her, og eg var ivrig etter å kome i gang. Eg har følgt treningane på video medan eg var i Portugal, men du får eit anna inntrykk av spelarane og kvalitetane deira, både kollektivt og individuelt når du er på feltet.

Rykta fortel at spelarane får køyrt seg på treningsfeltet. Pereira stadfestar at treningane er tøffe, og det må dei vere seier han. Om dei skal ta steg, utvikle seg, og bli betre enn konkurrentane, må dei trene. Dette er ikkje nokon feriekoloni, men spelarane har respondert bra på utfordringa.

– Dei har handtert det bra, slår Pereira fast.

Alt kan skje

Førstkommande laurdag dreg dei til Eid for årets første treningskamp. Motstandar er Brattvåg, som Florø kjem til å møte igjen når serien startar opp i slutten av juni. Kva kan vi vente oss av Florø i den første treningskampen?

– Resultatet er ikkje viktig på laurdag. Om vi skulle tape med eit mål eller to, er det ikkje så farleg. Eg forventar at det blir ein god leksjon, og at vi får vist fram noko av det vi har jobba med på treningsfeltet. Vi har tre veker fram til seriestart der vi kan gjere feil, og korrigere dei.

– Det er mange nye spelarar som skal sveisast saman til eit lag denne sesongen. Er det lov å håpe at Florø kan utfordre på øvste del av tabellen, eller er det litt vel optimistisk?

– Eg har enno ikkje god nok oversikt over konkurrentane til at eg kan seie kor vi står samanlikna med dei. Det eg forventar er at vi skal vere konkurransedyktige. At vi skal vere gode nok til å kjempe om tre poeng i kvar kamp, og då kan alt skje. Eg gler meg til å kome i gang med serien, så får vi sjå korleis det går.

Mykje jobb

Pereira fortel at han ikkje har hatt tid til å utforske Florø og omland i særleg grad hittil. Det har vore jobb frå tidleg morgon til langt på kveld den første tida, men så langt er han positivt overraska over veret.

– Eg har vore på kontoret på klubbhuset frå ni om morgonen til sju-åtte om kvelden kvar dag så langt. Eg har ikkje fått utforska byen enno. Alle snakka om at der var så mykje regn i Florø, men no har eg vore her i 18 dagar, og det har vore strålande ver i 14 av dei. Eg ser fram til å sjå litt meir av byen og området når eg får litt tid til overs, avsluttar portugisaren og går tilbake til treningsfeltet.

Serien startar opp 20. juni, og Florø opnar med bortekamp mot Eidsvold Turn. Firdaposten og Amedia viser alle PostNord-kampane til Florø, både heime og borte i år også.

Kommentarer til denne saken