No treng du ikkje Google på Storåsen lenger

Tysdag avduka folkehelsekoordinator Elisabeth Solheim i Flora kommune og Siv Merete Stadheim i Flora turlag ei ny informasjonstavle på utkikspunktet vestover på Storåsen i Florø. Med denne på plass slepp du å dra fram smarttelefonen, bruke og google opp namna frå kartet. Mobilen kan lett parkerast heime.

– Når du er ute på tur – opplever ofte at folk kjem og spør kva den og den toppen eller øya heiter. Det kjennest ok ut å kunne svare på det. Eg trur at eit slikt skilt vil kunne trigge folk til å komme seg meir ut på tur i nærområdet, seier folkehelsekoordinator Elisabeth Solheim.

– Det er fint å nyte utsikta og kunne fortelje litt om kvar plass du ser. Eg trur denne skiltinga er med å betre opplevinga av turen, understrekar turlagsleiar Siv Merete Stadheim.

Det er hjørnesteinsverksemda Ewos som har spandert dei naudsynte midlane. Dei har sett av pengar til helsebringande tiltak i nærområdet. Skiltet er laga i samarbeid mellom Frode Ryland i Origod og reklamebyrået A til Å.

– Vi har faktisk teke oss tid til å reise rundt med båtførarane i Florabassenget for å sikre oss rett plassering av namna, fortel leiar Malvin Horne i A til Å.

Neste prosjekt er å få plassert eit liknande skilt på Brandsøyåsen, der det er utsikt mot dei indre bygdelaga og Flora-øyane i aust, sør og vest. Ein ser også Tvibyrgje, Alden og Bulandet og Solund i det fjerne.