På kvelden torsdag 20. oktober slår Iver Senneset, Oliver Igland og kameratgjengen i Oddny an tonen i ein heilt unik konsertsal.
Den ligg i andre etasje i den eldste delen av bygningsmassen til det som no er Iglandsvik Næringpark. Det var i si tid eit lite privilegium å jobbe på kasseloftet, sidan arbeidarane her i motsetning til gjengen på golvet i første etasje, kunne gå tørrskodde på eit tregolv og hadde det lunt og godt. På 60-talet gjekk det mest i spikring av fiskekasser, men etter kvart vart stifting av pappkartongar hovudgeskjeften på kasseloftet.
Historikk
Bremanger Fryseri i Iglandsvik vart starta i 1960 av Sogn og Fjordane Fiskesalslag.
Etter økonomiske vanskar overtok fiskehandlar Halvard Lerøy i Bergen eigarskapen. Lerøy hadde då også hand om fiskemottaket i Bulandet og hadde føringsbåt som frakta fisken til Bergen.
Det vart teke mot kvitfisk frå den lokale sjarkflåten, som gjerne vart konservert med salting og ising før transport.
Då pigghå-fisket ved Shetland utvikla seg ut over 1960-talet var det også stor aktivitet med håskinning, som var akkordbetalt arbeid. Håskinninga var konkurranse-prega, der dei mest effektive vart lokale b-kjendisar. Fileten og buklappane frå pigghåen var ei attraktiv eksportvare.
Anlegget fekk etter kvart også utvida kapasitet til mottak av sild og makrell og i dei siste åra bygde ein om gamledelen av bygget som lakseslakteri.
Lerøy-verksemda utvikla seg til eit moderne sjømatkonsern, som kjøpte seg opp laksebransjen. Dei selde anlegget til lokale eigarar i 1996. Verksemda gjekk konkurs i 2006 og kring 45 menneske mista arbeidet sitt. Bremanger kommune tok over bygget.
I 2008 overtok Bremanger Sea and Residences AS anlegget med tanke på å byggje det om til fritidsbustader. Oppkjøpet skjedde rett før finanskrisa.
i 2016 kjøpte Havstjerna Eigedom bygget.
– Vi arrangerer konserten for å skaffe midlar til at Oddny kan få spele inn musikken sin i eit lydstudio. Det skal også produserast ein promo-video frå denne konserten i desse historiske omgjevnadene, fortel primus promotor Roger Igland. I denne samanheng med to hattar, både som far og som eldsjel bak konsertaktiviteten i Musikk-Kafe i Bremanger.
Bak det solide kvinnenamnet Oddny, finn du fire unge karar som bur i eksil i Oslo/Bergen.
Tre av dei spelte i lag i Bremanger-bandet Silo,, som i 2017 vann ein konkurranse om å bli årets unge band i Norsk Bluesunion. Gitarist, låtskrivar og songar Iver Senneset, trommis Oliver Igland og bassist Galek Bartek frå Førde. Med seg i det nye bandprosjektet har dei fått med seg keyboardist Edvard Røgeberg frå Sandane.
Iver Senneset skriv tekstar på klingande bremanger-dialekt og bandet arrangerer låtane i fellesskap. No har dei mykje godsaker på lager som dei ønskjer å dele med omverda. Billettinntektene frå konserten går uavkorta til Oddny, som skal bruke pengane til arbeid i lydstudio.
Bremanger-bandet Oddny går i fotspora til kjende dialektrockarar. Så gjenstår å sjå kor langt dei kan gå.
No skal finurlege Oddny treffe Oslo-publikum
