Gå til sidens hovedinnhold

Då Rodrigo scora tok kjenslene overhand for Håkon. – Kva gjorde eg der eigentleg?

Det har vore mykje motgang for Florø sitt lag i PostNord-ligaen i år, men i helga kom sigeren. Rodrigo Lima scora det vakre andremålet, og ingen var gladare for det enn Håkon Giæver Gjerstad.

For abonnentar

Det var på ein måte det siste toget som gjekk for Florø søndag. Med tap for Senja ville det sjå mørkt ut med tanke på å redde plassen i PostNord-ligaen. Tre poeng var det einaste som var godt nok.

Det begynte bra. Allereie etter 8 minutt stanga Joni Mäkelä Florø i leiinga, og sjølv om Senja hadde starta best fekk Florø kampen inn i sitt spor etter scoringa. Dei hadde god kontroll i resten av omgangen.

I andre omgang kom Senja sterkt ut av startblokkane. Vi som såg kampen heime på TV-skjermen begynte å frykte at utlikninga ville kome, men Florø sin nye midtbanespelar, Rodrigo Lima hadde andre planar.

Kjensler som måtte ut

Etter 66 minutt får han ballen frå Mäkelä, på 20 meter. Han lader kanonen, og klistrar ballen opp i krysset. I hjørnet av TV-skjermen kunne vi sjå midtbanespelaren Håkon Giæver Gjerstad falle på kne, og hamre laus på kunstgraset i Senja storhall med knyttneven. Her var det openbert store kjensler som rasa i kroppen?

– Det var mykje kjensler i kroppen som måtte ut. Eg har sett det i etterkant, og då var det sånn, «kva gjorde eg der eigentleg»? Det var verken kontrollert eller planlagd, ler Gjerstad.

Her kan du sjå scoringen, og feiringa

Florø måtte vinne borte mot Senja for å halde liv i håpet om å spele i PostNord-ligaen i 2022. Det gjorde det, takka vere dette langskotet. Florø slår Senja 2-1 i Senjahallen.

For bergensaren som har gjort Florø til sin klubb etter at han kom til byen i januar legg ikkje skjul på at det har vore tøft å gå frå tap til tap gjennom vårsesongen. Når 2–0 målet kom, og den første sigeren såg ut til å vere i boks måtte det kome ein reaksjon. Han var kanskje den einaste som prøvde å slå hol i bakken på Senja, men han var ikkje den einaste som kjente på ei stor lette når kampen var over, og dei kunne ta reise heim med tre poeng på kontoen.

– Det har vore ein kjip start. Vi har reist Norge rundt. Tapt, prøvd å restarte igjen, berre for å tape på nytt. Det er blytungt. Vi brukar så mykje tid på dette, jobbar knallhardt, og så får vi ikkje betalt. No fekk vi fem dagar med fri, så var vi tilbake på tysdag og jobba inn mot Senja-kampen for å prøve å starte på nytt no i haustsesongen. Det klarte vi. Det var ein letta gjeng som reiste heim igjen. I staden for å henge med hovudet var det smil og senka skuldrer. Vi har venta ganske lenge på dette, forsikrar Gjerstad.

Eit av dei vakraste måla

Rett etter scoringa fekk Senja eit straffespark som såg noko billeg ut, og Markus Johnsgård reduserte til 1–2. Dermed blei avslutninga på kampen litt meir spennande enn både Gjerstad og Florø-tilhengarane sette pris på, men fleire mål blei det ikkje. Dermed blei Rodrigo Lima matchvinnar for Florø. Han kom til Florø i juli, men blei ikkje speleklar før overgangsvindauget opna 1. august. Scoringa smakte sjølvsagt godt, også for han som scora målet.

– Det var eit av dei vakraste måla eg har scora i mi karriere, men det var enno meir spesielt fordi vi vann kampen. Ein siger vi har fortent og venta på ein god stund. Det var ein heilt unik kjensle å sjå ballen gå i mål, fortel 22-åringen frå Portugal.

Lima valde Norge og Florø fordi han likte planane og prosjektet til landsmann og Florø-trenar Goncalo Pereira. Draumen er å få spele i den norske Eliteserien, men aller først handlar det om å vinne kampar med Florø Fotball. Fleire kampar. Håpet er at dei no kan bruke sigeren over Senja til å bygge vidare på, og ta tre nye poeng mot Bærum allereie onsdag kveld heime på Stadion.

– Det er klart vi vil. Vi trener kvar veke med tanken om at vi kan vinne kvar kamp. Onsdag blir ikkje noko annleis, bortsett frå at vi no vil vere enno meir motivert etter denne sigeren. Vi vil gi fansen ein ny siger som takk for all støtta vi får. Vi er på rett veg til å gjere Florø til det laget klubben og byen fortener, forsikrar Lima.

Høyrer Stimen

Mot Vålerenga 2 var det 267 tilskodarar på Stadion. Det er færre enn det vi har vore vant med når A-laget spelar heime, men Gjerstad forsikrar om at spelarane høyrer Stimen under kampane, og trur det er mogleg å få fleire folk tilbake på tribunen. Alt som skal til er å vinne fotballkampar.

– Vi har ikkje levert på det nivået vi skulle ønske, og som vi veit vi kan. Men vi veit at folk bryr seg, og følger med. Vinnar vi så kjem det folk på kamp igjen, det er eg sikker på, seier Gjerstad, som vi trur har eit potensial til å bli ein skikkeleg publikumsyndling. For han spelar med hjartet på utsida av drakta.

– Det er slik eg er. Dei skal i kvart fall ikkje ta meg på innsats, eg gir alltid alt eg har.

– Du smell til i duellane, men du får nokre smellar sjølv også?

– Eg får litt juling, men det må eg tole. Det er ein del av fotballen det også, seier Gjerstad.

Alt å spele for

Florø ligg framleis sist på tabellen etter sigeren mot Senja, men no er det kontakt. Med siger over Bærum på onsdag er dei på skothald av trygg plass. Dei har framleis alt å spele for, og går det slik Gjerstad og Lima trur, kan det bli ei fin haust for dei som heiar på Florø Fotball.

– Det er 45 poeng igjen å spele om. 15 kampar. Med folk tilbake frå skader kan vi slå alle laga i avdelinga. Vi spelarane, og alle i klubben har stor tru på at vi kan klare dette. Kampen mot Bærum blir utruleg viktig, og eg trur vi kan vinne den.

Kampen ser du direkte på Firdaposten klokka 17.00 ondsdag.

Kommentarer til denne saken