Gå til sidens hovedinnhold

Botox-leppe og gangsperre: No rullar breiddefotballen igjen!

FK Tempo har nye trenarar i år, og no kan dei endeleg gjere jobben sin og trene laget. Måndag var første trening på halvanna år. No er det berre å vente på skadane.

For abonnentar

– Det var tydeleg at dei ikkje hadde spelt fotball på ein stund, ja.

Kommentaren kjem frå Steffen Fimland. Saman med Patrick Kinn Breidvik utgjer han det nye trenarteamet til FK Tempo, og måndag denne veka kunne dei samle laget til ein ordentleg trening igjen. Det er første gong sidan det meste blei stengd ned i mars 2020, og ifølge dei to trenarane var det tydeleg at det var lenge sidan gjengen hadde sparka ball.

Botox-leppe

– Det var så mykje rart. Pasningar som gjekk alle vegar. Folk som nesten ikkje kunne springe. Nivået var ikkje skyhøgt. Men gje dei nokre veker, så er dei nok tilbake på gamalt og godt nivå igjen, spår Breidvik.

– Fotball på dette nivået har eit rykte på seg for å vere farleg, og det blir vel ikkje betre av at spelarane har brukt det siste året på sofaen. Blei det nokre skader på den første treninga?

– Benjamin Eggen fekk botox-leppe etter å ha fått ein ball i trynet, men utover det var det ingen som blei skadd. Men det er mange som har klaga på gangsperre etterpå, så det var nok tøft å starte opp igjen.

– Eg tippar skadane kjem i løpet av neste veke, seier Fimland.

Utover ei kjapp oppvarming, driv ikkje Tempotrenarane med noko særleg løpstrening. Då er trenarane redd fråfallet hadde blitt stort på kort tid. Dei køyrer heller ikkje avanserte øvingar. På treningane spelar dei stort sett fotball.

Likestilte trenarar

Den dynamiske trenarduoen med Fimland og Breidvik blei stabla på beina etter at Torbjørn Løkkebø takka ja til å ta over trenaransvaret for rivalane Eikefjord. Arbeidsfordelinga er klar., men kven av dei to som er hovudtrenar er dei ikkje heilt einige om.

– Patrick er hovudtrenar, seier Fimland.

– Det er eg ikkje. Eg er kampansvarleg, og du er treningsansvarleg. Saman er vi dynamitt, repliserer Breidvik.

– Det siste der kan du sitere han på, svarar Fimland.

Saka held fram under bildet

To likestilte trenarar er ikkje så vanleg i fotballen, men FK Tempo har valt å gå for den løysinga. Steffen Fimland var del av eit trenarteam med Torbjørn Løkkebø, og er klar på at det er ein fordel å vere to trenarar.

– Vi må nesten vere to trenarar, for dette er ein jævla barnehage til tider. Det er ikkje lett å halde styr på denne gjengen. Det er sutring heile tida, og ingen kan ta ein beskjed, seier han.

– Styreleiar Benjamin Eggen jobbar jo i barnehage. Klarar ikkje han å oppføre seg, heller?

– Han var veldig flink og pedagogisk då han var trenar ei kort stund, det skal han ha. Men som spelar er han minst like ille som dei andre. Og samanliknar du treningane med ein barnehage, blir han dritsur, legg Breidvik til.

Vil vinne serien

Sesongen startar opp i august, og dei to trenarane ser fram til å spele kamp igjen. Ingen av dei er redde for å få sparken om sesongstarten ikkje lever opp til forventningane. For fotball i FK Tempo er først og fremst sosialt. Men Breidvik og Fimland har uttalte ambisjonar for den kommande sesongen.

– Vi går for å vinne serien. Så får vi heller sjå om vi tek i mot opprykket etterpå, seier Breidvik.

– Ja, for sjølv om grunntreninga ikkje er den beste, og snittalderen begynner å bli høg, så er det spelarar her som det bur mykje fotball i?

– Ja, Simen Reksten Solheim og Andre Reksten skal spele for FK Tempo i år. Dei har no OBOS-erfaring, og vi har fleire som har spelt fotball på rimeleg høgt nivå her. På vårt beste er vi ganske gode, erklærer Breidvik.

– Men dette er ikkje toppfotball. Det er trim utan trimpoeng, slår Fimland fast.

Erkerivalane

Så får vi sjå om trim-gutane kan sanke inn nok trepoengarar til at dei vil kjempe i toppen i år. Trenarane har trua, og den ufrivillige pausen frå fotballen ser ikkje ut til å ha ført til stort fråfall av spelarar, snarare tvert i mot.

Det er 35 mann som har sagt at dei vil vere med i år. På den første treninga var det 23 av dei som møtte opp. Det lover godt, sjølv om erfaringa viser at det nok kan bli utfordringar å få nok folk til bortekampane.

– Vi er mange på trening, men på bortekampane er vi nøgd om vi klarar å stille lag. Har vi eit par innbytarar er det berre bonus., meiner Fimland.

Men for trenarane er bortekampane noko av det mest morosame. Bortekampane mot Fure er det spesielt gøy å vere med på.

– Det er det der med å reise saman. Samhaldet og kameratskapet, det likar eg. Bortekampane mot Fure er sesongens høgdepunkt. Dei er erkerivalane våre. Det blir alltid tette kampar og høg temperatur når vi spelar mot dei, seier Breidvik.

Oppstart for 6. divisjon, om alt går etter planen, er sett til 17. august. Kanskje med kamp mot Eikefjord på Eikefjorddagane. Siste serierunde skal spelast 12. oktober.

Kommentarer til denne saken