Å ri to hestar samtundes er ikkje lett, og mange har feila i forsøket. Men Florø Fotball klarte kunststykket med glans. 3-0 over Sotra med ei reserveprega lag blei ytterlegare toppa med heile 4-0 over Molde i juniorcupens 4. runde. 18. august 2012 går over i historia som ein av dei absolutt største dagane i Florøfotballens historie.

"B-gjengen" innfridde

Sotra kom best i gang mot det noko reserveprega Florø-laget i 3. divisjonskampen som innleia super-laurdagen. Florø verka nervøse og det tok litt tid før laget kom i gang. Men gjestane sleit med å komme til dei store sjansane, og etter å ha rista av seg ned nervøse opninga kom heimelaget meir og meir med, og etter ein snau halvime sendte Simen Reksten Solheim heimelaget i føringa.

Fem minuttar før pause dobla formsterke Mats Hovland leiinga. Eikefjordingen har for alvor funne skåringaforma. Så seint som torsdag noterte han seg for to nettkjenningar då andrelaget vann 4-1 mot Hornindal, og for ei veke sidan sikra han alle poenga med ei skåringa på tampen av oppgjeret mot Tornado Måløy.

Gode debutantar

Både Simen Halvorsen og Martin Orheim var på plass i startoppstillinga, og dei to fekk med det debuten i 3. divisjon. Begge leverte solide prestasjonar, og viste med det noko av den store bredda som er i laget for tida.

Halvorsen krona debuten då han midtvegs i andre omgang slo ei nydeleg gjennombrotspasning som sendte Kim Vik åleine med Sotra-keeperen. Åleine med sisteskansen gjorde den tidlegare Eid-spelaren ingen feil og avgjorde kampen med si 3-0 skåring.

Eivind Nybakk er tilbake i Florø etter tre års studiefråvær, og han fekk spele det siste kvarteret. Mot slutten fekk også 16 år gamle Torde Hovden nokre minuttar og han blei med det dagens tredje debutant.

Men fleire skåringar blei det ikkje i det som til slutt blei ein komfortabel 3-0 siger til Florø, og ei perfekt oppladning til juniorkampen mot Molde.

Jamspelt

Og det såg ut til at det sterke resultatet inspirerte. For Florø gjekk hardt ut og kom til ein kjempesjanse allereie i det første speleminuttet. Minuttar seinare hadde dei også ein ball i nota, men den "skåringa" blei korrekt annulert for offside.

Men deretter jamna det seg ut. Molde kom meir og meir med og hadde ballen mykje i store delar av første omgang. Men dei sleit med å komme til store sjansar mot eit godt organisert og hardt kjempande heimelag. Nærmast var dei etter eit fint angrep knappe ti minuttar før halvtid, men avslutninga gjekk utanfor.

Florø kom heller ikkje til dei klokkeklare sjansane, og første omgang ebba ut med 0-0.

Effektive

Halvor Solheim-Olsen har for alvor markert seg denne sesongen, og skulle bli sentral også i denne kampen. Han fekk den første store sjansen i andre omgang, men Molde-keeper avverga med ei god beinparade.

Men minuttar seinare måtte Moldes sisteskanse kapitulere, og igjen var det Solheim-Olsen. 18-åringen vann luftduellen inne i feltet etter eit innlegg frå høgrekante og heada Florø i føringa.

Berre tre minuttar seinare jubla Molde for det dei trudde var utligning, men skåringa blei annluert for det dommaren meinte var angrep på Florø-keeper Knut-Marius Kvammen. Molde-spelarane protesterte heftig og meinte at det var ein Florø-spelar som kolliderte med Kvammen, men til ingen nytte.

Då låg kampen og vippa, men med 20 minuttar igjen på stadionuret dobla Solheim-Olsen leiinga.

Satsa alt

Molde gav ikkje opp, og var uhyre nær redusering etter eit hjørnespark kvarteret før slutt. Men den offensive satsinga etterlot seg store rom bakover, og like etter snappa Kristoffer Book eit tilbakespel og sørga enkelt for 3-0.

Molde burde redusert nokre minuttar seinare, men avslutninga frå god posisjon enda langt over. Det såg ut til å ta det siste motet frå slagne Molde-spelarer og Florø fekk overgangsmoglegheiter dei siste minuttane.

På overtid fekk Peter Aase sjansen til å sørge for den perfekte avslutninga i Florø-drakt. Han blei som kjent utvist i seriekampen mot Eid for nokre veker sidan, og fekk då tre kampars karantene. Det forsinka overgangen til Sogndal, og gjorde at han fekk sjansen i dag.

Han leverte som vanlig solid innsats, og krona det heile med å fastsette sluttresultatet til 4-0. Ei praktfull gjennombrotspasning etter ein overgang sendte han åleine med keeper, og den kommande Sogndal-spelaren gjorde ingen feil.

Dermed er Florø klare for kvartfinale, saman med sterke lag som mellom anna Brann, Viking og Rosenborg. Kven motstandaren blir og om det blir ein ny heimekamp blir truleg klart i løpet av neste veke.

Lykkerus

Trenar Geir Rindheim var strålande nøgd etter dei to sterke triumfane.

- Vi satsa på to hestar samstundes, og hadde sjølvsagt ein draum om å lykkast i begge kampane, men dette var langt over det vi kunne forvente. Eg har nesten ikkje ord som kan beskrive kor stolt eg er akkurat no, smilar han og meiner ein periode midtvegs i andre omgang blei avgjerande.

- Vi fekk det viktige førstemålet, og så får dei annulert si skåring. Like etter kjem så 2-0, og dei to siste kjem som eit resultat av at Molde satsa alt framover.

Kampfakta

Florø - Molde 4-0 (0-0)
4. runde NM G19

1-0 63 min Halvor Solheim-Olsen
2-0 70 min Halvor Solheim-Olsen
3-0 78 min Kristoffer Book
4-0 90 min Peter Aase

Gult kort Florø: Peter Aase

Florø: Knut-Marius Kvammen, Runar Helland Aamot, Runar Hove, Aksel Knapstad, Anders Sørensen, Peter Aase, Aksel Bauge (Erik Selaas frå 80 min), Simen Hamre (Dino Omerovic frå 89 min), Kristoffer Ryland, Kristoffer Book (Kristian Rindheim frå 88 min), Halvor Solheim-Olsen (Kristoffer Sigdestad frå 70 min)

Reultat 3. div avd 08. 17. serierunde

Bergen Nord - Øystese 2-5
Florø - Sotra 3-0
Radøy/Manger - Førde 2-8
Årdal - Stryn 2-0
Saga - Vik 3-4

Voss - Tornado Måløy og Eid - Fyllingsdalen 2 blir spelt søndag

Førde toppar framleis tabellen, ti poeng føre Florø som avanserte til andre plass. Voss kan ta den tilbake om dei vinn mot Tornado Måløy.

Tornado Måløy, Bergen Nord og Eid ligg framleis under streken.

Resultat 4. runde NM G19

Brann - Bryne 5-0
Rosenborg - Levanger 3-1
Lørenskog - Sortland 4-0
Viking - Sandnes Ulf 6-1
Sarpsborg 08 - Lillestrøm 5-3
Odd - HamKam 5-1
Florø - Molde 4-0
Strmsgodset - Skeid blir spelt søndag

Kvartfinalane skal spelast 8-9. september

Toppscorarlista for Florø Fotball (kun seriekampar, 3. div)

Kristoffer Book 12
Christer Husa 6
Halvor Solheim-Olsen 5
Kristoffer Ryland 4
Mats Hovland 2
Aksel Knapstad 2
Andre Reksten 2
Simen Reksten Solheim 2
Kim Vik 2
Peter Aase 2
Stefan Aase 2
Simen Hamre 1
Runar Hove 1
Kristoffer Sigdestad 1
Stian Tansø 1
Sjølvmål 1