Gutar 98 dominerte dei tre innleiande kampane, og i kvartfinalekampen mot Gneist vann dei overlegent 4–0. Dominerte gjorde dei også i semifinalen mot Sykkylven, der dei vann 3–0 utan store problem.

Trenden fortsette også i finalekampen mot Fana. Kort tid etter pause skåra Sander Gjertsen det første målet for Florø, etter ei gjennombrotspasning. Seinare sette Gjertsen inn Florø sitt andre mål, også etter ei gjennombrotspasning.

– Det var utruleg stort, seier ein glad Sander Gjertsen etter å ha komme heim att til Florø.

Glad er også trenar Steinar Hopen, men han vil ikkje fokusere på enkeltprestasjonar.

– Først og fremst var dette ein lagsiger ­– alle medverka enormt til at vi no kan kalle oss vinnarar av Lærum cup, seier ein stornøgd Hopen og legg til:

– Dette er første store sigeren vår. Det beste resultatet frå tidlegare turneringa er eit tap i finalen i Storsjöcup. Så det å nå toppen i Lærum cup, i sterk konkurranse med gode bergenslag, er ei bragd det står respekt av, seier han.

Hopen understrekar også at sigeren er eit resultat av mange år med hardt arbeid og mykje trening.

– Dette er ein del av kulturen som har vakse fram innan aldersbestemt fotball i Florø Fotball. Det lovar godt for rekrutteringa til A-laget, seier trenar Hopen.