Under krinsmeisterskapen 2009 på Florø stadion i går, sette Eivind Stavang (27) krinsrekord på 100-meter med tida 10.93, noko som er svært bra i og med at vi no er seint i sesongen.

Like etter var det ein spanande 200 meter øving i hekk, som for øvrig ikkje går inn som ein krinsmeisterøving.

Øyvind Kjerpeset Strømmen (18) og Eivind Stavang deltok i denne øvinga, men denne gongen var det Øyvind som drog det lengste strået.

Han løp inn til tida 24.30. Dette er ny krinsrekord, klubbrekord og ny aldersrekord på landsplan. Det var dessutan berre hundredelar frå den norske juniorrekorden.

Trass i prestasjonane på banen, var oppmøtet ikkje av det betre med 160 deltakarar. Det seier Rune Osa i Florø turn og idrettsforening.

– Det har vore eit svært vellukka arrangement. Men med lita deltaking. Det har å gjere med at vi er såpass seint i sesongen, seier han.

Likevel vart KM 2009 svært så vellukka for deltakarane, spesielt blant dei yngre som såg ut til å ha ei framifrå oppleving på stadion laurdag.