Både Øyvind Strømmen Kjerpeset og Steinar Kleppe innfridde under dagens øvelsar under junior-NM i friidrett som blir arrangert i Bodø denne helga.

Kjerpeset sikra seg gullet på 400 meter hekk, men under håplause forhold var han aldri i nærleiken av å kunne true den gamle noregsrekorden til trenar Dag Ove Flatjord. 17-åringen kom i mål på tida 55,01, og det holdt til seier. Per Magne Florvaag frå Sandnes tok sølvet på tida 55,11.

- Forholda var håplause, det var regn og vind og berre 10 grader. Eg prøvde berre å sikre gullmedalja, fortel Kjerpeset. Han var også i aksjon i eit forsøksheat på 200 meter der han kom inn på andre plass. Med det er han kvalifisert til morgondagens finale. - Eg stiller godt forberedt, og har godt håp om å hevde meg bra både på 200 meter og på 110 meter hekk, i tillegg til at vi trur på eit godt resultat på stafetten, held han fram.

Steinar Kleppe vann sleggekonkurransen i klasse jr22, han fekk opp eit bestekast på 57,64 og det holdt i massevis. Vegard Henriksen frå IK Tjalve blei nummer to med 51,92. Daniel Ullaland Nekkøy kom på 7.plass i jr19 klassen med eit beste kast på 46,77.

I lengdekonkurransen kom Kim Nes Leirvik på tredje plass med 6,60, fattige fem cm bak andreplassen.