Øyvind Strømmen Kjerpeset (17) er spydspissen til FT&IF som fredag er i Bodø for å konkurrere i junior NM. Han er gullfavoritt på 400 meter hekk, men har også medaljesjansar på to andre øvingar.

Men utanom medaljekampen er det ein rekord 17-åringen drøymer om å slå. Nemleg trenaren sin.

Trent av meister

For han blir trent av ein norsk meister på langhekken. Dag Ove Flatjord sprang for BFG Fana då han sette pers på 400 hekk. Det skjedde var på eit nasjonalt stemne på Årdal stadion i 1982. Den gongen klokka Flatjord inn på tida 52.76.

– Eg håper rekorden lev sine siste dagar, kjem det frå ein tent Strømmen Kjerpeset. No følger han det same opplegget som før EM der han var i kjempeform. Allereie fredag får han sin første sjanse til å slette rekorden då det er forsøk på 400 meter hekk.

– Får eg full klaff i Bodø skal eg slette rekorden. Om ikkje det går har eg ein ny sjanse helga etterpå, seier han. Då er det nordisk landskamp i Finland for juniorutøvarar der Florøguten stiller i blokkene.

– Har kapasiteten

Trenaren vedgår at det blir litt vemodig om eleven slettar rekorden sjølv om han håper eleven klarar det.

– Det er jo litt vemodig om han tar den, men det skal seiast at eg var 22 år den gongen og Øyvind er ikkje 18 enno. Så om han klarer den tida er det utruleg oppløftande, seier trenar Dag Ove Flatjord.

Han trur 17-åringen er god nok for fleire medaljar denne helga.

Trur på medaljar

– Eg håpar på gull på 400 meter hekk og bronse på korthekken. På 200 er det meir ope. Han er utruleg godt trent og toler å løpe mange løp slik han skal i Bodø denne helga, og med klaff kan han ta medalje på 200 også, slår Flatjord fast.

På 200 meter er det veldig tett melom 5-6 løparar.

– Eg trur eg har det som skal til for å hamne blant dei tre første. Per Magnus Solli er rimeleg suveren på 200 meter og vinn om han ikkje får ein skade. Bak han er det veldig ope, seier Strømmen Kjerpeset.

Stiller stafettlag

I tillegg til dei to hekkøvingane og 200 meter er Strømmen Kjerpeset ankermann på stafettlaget.

FT&IF stiller desse utøvarane på 1000 meter stafett: Ole Jacob Lid har på førsteetappe 100 meter. Han vekslar med Jørgen Bjørkedal som løper 200 meter. Jonas André Brandsøy løper 300 meter og vekslar med Øyvind Strømmen Kjerpeset som har ankeretappen på 400 meter.

– Eg håpar eg skal vere god form til helga. Eg gjer akkurat det same no som eg gjorde veka før EM og då var eg i kjempeform på fredagen, og det er fredag eg skal gjere mitt første løp, avsluttar gullhåpet.