I alt er 15 deltakarar frå Sogn og Fjordane påmelde til den nasjonale meisterskapen, og Florø Turn- og Idrettsforening har største troppen her frå fylket.

Dei har også to utøvarar som blir rekna som medaljekandidatar. Først og fremst er det Eivind Stavang som ikkje er ukjend med NM-gull. I år har han berre fire konkurrentar på 110 meter hekk, når han laurdag ettermiddag skal forsvare førsteplassen frå 2008. Stavang har ikkje betre enn 14.34 som årsbeste, men det er likevel godt nok til å toppe landsstatistikken. Veslebror Vukicevic, 18-årige Vladimir, blir nemnt som ein stor outsider på korthekken.

I morgon er hekkane plasserte rundt heile bana, og blant dei ti som skal forsøke å kvalifisere seg til finalen på 400 meter hekk finn vi Øyvind Strømmen Kjerpeset. Ungguten frå Florø kan med eit maksløp blande seg inn i medaljestriden. Andreas Totsås er den store favoritten, medan Strømmen Kjerpeset er venta å kjempe mot Ragnar Bergheim og Atle McAdam om sølv/bronse.

Øyvind Strømmen Kjerpeset er også på deltakarlista til 200 meter laurdag, og i morgon stiller Eivind Stavang til start på den halve distansen.

Kim Nes Leirvik skal også konkurrere i to øvingar. Stav, der det berre er ni påmelde, slik at han går til direkte finale fredag. Dagen etter skal Nes Leirvik forsøke seg i lengdegropa.

Kasttradisjonane i Florø T&IF skal forsvarast av kulebrørne Yngve og Idar Grøneng Havn og sleggekastarane Steinar Kleppe og Ann Merethe Vågane. På grunn av få deltakarar i kule og slegge treng ingen av dei å kvalifisere seg til finalane. Kule og slegge for menn går i morgon, mens Ann Merethe skal i sleggeringen laurdag.

Florø Turn- og Idrettsforening har også meldt på eit lag til 1000 meter stafett for menn på avslutningsdagen søndag.