- Heilt fantastisk, seier elitekoordinator Ståle Jan Frøynes om dei nye rekordane som kom i det første innandørsstemnet i friidrett nokon sinne i Florø. For no står det Sparebanken Sogn og Fjordane Indoor Florø bak den nye rekordane på 60 og 100 meter innandørs for kvinner.

Ezinne Okparaebo viste til dei grader at ho er eit stortalent å rekne med. Først smadra ho Ingvild Larsen sin elleve år gamle rekord på 60 meter til jubel i Florø Idrettssenter.

Kom brått

Friidrettssjef Kjetil Tømmernes kunne fortelje at han ikkje var overraska at Okparaebo kunne senke 60 meters rekorden til Larsen, men meinte den kom veldig brått på. Rekorden stadfesta såleis at sprintstripa i Florø er lynrask.

Deretter var det finale på 100 meter der Elisabeth Slettum sin norske rekord vart sletta av den nye sprintdronninga Ezinne Okparaebo.

Nøgd tross alt

Det lokale håpet Eivind Stavang lukkast ikkje med å kvalifisere seg til EM i Birmingham. Han skulle prøve å presse seg ned under EM-kravet på 60 meter hekk på 7.90 sekund, fattige seks hundredelar under sin eigen pers. Men det vart for langt fram.

- Eg har vore sjuk denne veka og ikkje heilt i toppslag, men det har kome seg så dette kan gå begge vegar, sa han før løpet. Med 8.05 i B-finalen var han nøgd tross alt.

- Det er det tiande løpet så langt i år som er under fjorårspersen så dette kan eg ikkje vere misfornøgd med, slo han fast.