Det er den første helga i august det skjer, i Dale i Fjaler. Bak festivalen, som er den andre i rekkja, står to unge entusiastar, Gaute Hope og Oddmund Haugen. I fjor samla dei nesten hundre filmfrelste som fekk ta del i eit program med ni filmar. I år håper dei på endå betre oppslutnad.

– Filmskaparar i alle aldrar, mest gutar i alderen 18-20 år. Vi vil oppfordre og be jenter om å lage meir film! Noka større filmerfaring har ingen, dette er ein amatørfilmfestival, og vi vil ha filmar frå amatørar – slike som går med ein idé, og som bruker det dei har til realisere den. I fjor kom alle filmane frå lokale folk. No vil vi med stønad frå EU ta sikte på ein litt større europeisk dimensjon, seier Oddmund Haugen, som er talsmann for initiativtakarane.

Sidan festivalen er blitt til gjennom ungdommeleg initiativ, har det kvalifisert til 60 000 kroner i støtte frå EU sit YOUTH-program. Ein del av dette skal gå til sjølve festivalen, medan ein god pott går med til to kurs i festivalen sin regi, det eine i slutten av mai og det andre i juli.

Og målet med festivalen er greitt definert:

– At alle som vil, skal få vise filmane sine for eit større publikum, seier Haugen. – Og så vil vi gjere noko kult for oss og for samfunnet vårt, legg han til.

Festivalen er open for alle som lagar film. Siste frist for innsending av filmar til festivalprogrammet er 22. juli. Meir informasjon finn du på www.daff.no.