Plate nummer to frå everybody’s darling, nesten. Ikkje meg.

Eg tykte ikkje debutplata ”Juluet’s Wishes” frå 2008 var noko å kave seg opp over. Det var ei plate som var grei nok, men som ikkje fekk nokre lyttingar utover pliktlyttinga.

No er ho klar med plate nummer to, har skifta plateselskap og har no nettopp motteke eit stipend frå Statoil på 800.000 øyremerkt utanlandslansering.

Det siste har nok ikkje noko med denne plata å gjere, men no prøvde eg på finne fram til positive hendingar i karrieren sidan førre plate. Og eg meiner heilt oppriktig at eg ønskte at andreplata var sterkare enn debuten.

Men det er ho dessverre ikkje.

Framleis skortar det på låtmateriale av god kvalitet. Og denne gongen finn ein ikkje eit klart høgdepunkt som "Only Just Begun".

Lydmessig har eg ikkje noko å utsette, produsent Frode Jacobsen (Madrugada) har nok ein gong sørgde for at det læt fint. Eg høyrer ekkoet av Joni Mitchell, Tori Amos og vår eiga Susanne Sundfør. Men ei fin innpakning klarer ikkje å dekke over den vesentlege mangelen, ingen verkeleg gode låtar.

Den beste låten her er singelen som kom i forkant av plata, ”Warrior Song”. Kanskje litt fordi den skil seg ut frå resten av plata med eit høgare tempo.