I jula kjem forskjellane mellom oss menneske sterkare fram enn i resten av året. Det er denne tida dei som har det vanskeleg ofte slit mest. Men det er også ei tid der verdiar om å vise varme og omtanke for våre medmenneske står sterkt. Det siste ønskjer hotella i Florø å eksponere i det vi trer inn i jula. Hotellkjeda Nordic Choice, som begge hotella i Florø er del av, har no ein aksjon der dei ønskjer å samle inn pakkar frå dei som har glede av å gi. Florø har dei funne eit lokalt godt, og viktig, formål for dei som ønskjer å få. I Florø har dei valt Krisesenteret som mottakar noko Krisesenterleiaren Wenche Hovland set stor pris på.

Flott omtanke

- Dette er eit veldig flott tiltak, som vil glede dei som brukar tenestene våre. Men det er også fint for oss at dei no set søkelyset på vald i nære relasjonar. Dette er eit stort samfunnsproblem som på denne måten kjem meir fram i lyset, seier Hovland.

For brukarar av Krisesenteret er folk i alle aldrar og frå alle samfunnslag. Det er ikkje noko einsarta gruppe. Men dei som kanskje lir mest, er dei mest størst forventningar til jula. Det er borna.

- Vi skal ikkje gløyme at det å vere vitne til vald i nære relasjonar er like traumatiserande som å vere utsett for vald sjølv, påpeikar Hovland. Ho trur borna på krisesenteret vil sette stor pris på å få ein presang på julaftan.

Gi borna jul

Entusiasmen blant hotellsjefane Siv Grov og Gro Leni Hansen er også tydeleg då vi møtte dei. For entusiasmen har allereie vist seg i form av pakkar under treet i hotellobbyen etter at sida kom opp på Facebook.

Dette er samfunnsansvar i praksis, fortel Gro Leni Hansen og meiner det ligg mykje omtanke i dei pakkane vi får inn. Håpet er at det skal bogne med pakkar under treet av klede og leikar til born som er eller kjem til Krisesenteret denne jula.