Onsdag er det møte i Helse- og sosialutvalet, og først på plakaten står synfaring på Florø sjukehus og SMS-senteret. Dei skal møte tilsette på begge stadene, og det vil truleg vere representantar frå Helse Førde-leiinga til stades under synfaringa på sjukehuset.

Det store spørsmålet for helsepolitikarane i Flora kommune er om ein skal kjøpe sjukehusbygget frå Helse Førde, og kva ein i så fall skal nytte sjukehusbygget til.

• Kva meiner DU, bør Flora kommune kjøpe sjukehuset? Sei meininga di i kommentarfeltet nederst!

Flora bystyre vedtok i vår at ein skal forhandle vidare med Helse Førde om eventuelt kjøp av sjukehusbygget, og at ein skal utgreie bruk og kostnader ved eit eventuelt kjøp. Rådmannen fekk då i oppgåve å sette ned ei tverrfagleg gruppe for å utgreie moglege bruksområder for eigedomen. Gruppeleiarane i bystyrepartia er styringsgruppe, og gruppeleiarane er også invitert til å vere med på synfaringa onsdag.

Ordførar Bengt Solheim-Olsen og HSU-leiar Jacob Nødseth har forhandla med Helse Førde om ein intensjonsavtale om kjøp av sjukehuset for 5 millionar kroner, samstundes som Helse Førde har vist stor vilje til å komme Flora kommune i møte med garanti om spesialisthelsetenester i Florø også i framtida. Men Flora bystyre ville ikkje godkjenne intensjonsavtalen då den var oppe til handsaming, mellom anna fordi den gav Helse Førde grønt lys til å flytte helsetenestene ut av sjukehusbygget.

Det er såleis framleis ikkje inngått nokon intensjonsavtale med Helse Førde.

Høgre vil kjøpe sjukehusbygget, medan "regjeringspartnar" Venstre ikkje ønskjer dette. Dei vil gjere alt for å binde Helse Førde sine helsetenester til Florø sjukehus. Høgre treng difor støtte frå Ap om dei skal få fleirtal for sjukehuskjøp i bystyret.

Høgre vil bruke sjukehuset til noko anna enn i dag, men dei har ikkje gått ope ut med kva dei ser for seg at bygget skal innehalde. Ombygging til omsorgsbustader har vore nemnd, det har også riving.