- Reknskapa for årets Laksens dag er no klare, og årets arrangement går ut i null. Arrangementet kjøper varer og tenester for godt 250 000 kroner i Flora i høve torgdagen, melder Øyvind Kråkås i Salmon Group. Kråkås var leiar for Laksens dag 2012.

"Laksens dag" er ein del av Himmel & Hav-helga, med andre storarrangement som Sildebord, Kinnaspel og musikkfest, og vert arrangert laurdagen i denne festivalhelga. BILDE: Laksens Dag og bilparade

Pengar til organisasjonar

I år nytta arrangørane seg av eventselskapet HippHipp Flora for planlegging og avvikling av sjølve opplegget på torget. Ein nytta og Norsk Hjortesenter på Svanøy til eit fagmøte på fredagen før sjølve laksedagen, med servering frå Florø-firmaet Bistro To Kokker.

- Laksens dag genererer pengar til lokale organisasjonar som Flora Røde Kors og Flora Rockeklubb, så vel som til ei rekke lokale verksemder, melder Salmon Group.

I tillegg til dei kostnadane som vert førte under arrangementrekneskapen, medfører og arrangementet ein omsetnad for overnatting og andre tenester som arrangementet sine gjester og deltakarar nyttar seg av. Direkte hadde Laksens dag om lag 40 gjester frå sponsorar og andre bidragsytarar som kom til Florø for å delta under arrangementet.

Motivasjon

- Frå initiativtakarane i laksemiljøet i Florø og Sildebordskomiteen var auka omsetnad for næringslivet i byen ein av motivasjonsfaktorane for å starte opp att med Laksens dag, og med den storleiken arangementet har fått, føler vi at dette har slått til, seier Kråkås.

- Vi er og svært nøgde med måten det lokale Røde Kors laget har teke hand om grillinga og serveringa. Harald Engevik har her vore ein viktig mann både for Røde Kors og for arrangementskomiteen, seier han på nettstaden Salmongroup.no.