Klokka 00.23 natt til laurdag, fekk politiet melding om at ein mann i 40 åra var blitt angripen i Eikefjord sentrum. Mannen var blitt slått ned bakfrå og sparka slik at han vart påført skadar. Det skriv politiet i politiloggen.

Mannen måtte oppsøke lege etter overfallet, og vart vidaresendt til Førde sentralsjukehus. Det skal vere to unge menn som er gjerningspersonar. Desse var ukjende for den fornærma i saka, og hendinga skjedde umotivert. Politiet har leita etter dei i Eikefjord utover natta, men utan resultat.

Dersom det er vitner til hendinga, som skjedde ved den nedlagde butikken i sentrum, ber politiet om at dei tek kontakt på tlf. 02800. Det vert oppretta sak som blir vidare etterforska av Flora politistasjon.

Litt seinare på natta, klokka 02.28, pågreip politiet ein mann i 20 åra etter melding frå publikum om promillekøyring i Florø sentrum. Han er mistenkt for køyring i rusa tilstand, og det er teke blodprøve. Han hadde ikkje førarkort. Det er uklart om han har fått lånt bilen han køyrde eller om den er stolen då ein ikkje har lukkast å kome i kontakt med bileigar. Saka vert vidare etterforska av Flora politistasjon.