Reaksjonane har vore svært positive etter at Firdaposten tidlegare i sommar presenterte gladnyheita at kokken Gitte Kroppan flytter heim frå Bergen for å opne kafé, delikatesse- og fetevareforretning i dei gamle parfymerilokala i Strandgata.

- Slik det ser ut no, blir det opning tidleg i september. Alt utstyr som barbeidsbenkar, kjøl og inventar er sett i bestilling, men vi kan ikkje fastsette ein endeleg opningsdato før vi veit at alt utstyret er på plass, seier Kroppan til Firdaposten.

Gitte har fem års erfaring frå det populære konseptet "Colonialen kjøkken & fetevare" i Bergen, der ei anna florøjente har vore sentral i oppbygginga, nemleg Laila Skorge. No dreg Gitte heim for å satse og ho legg ikkje skjul på at mykje av konseptet frå Bergen vil bli teke med heim til "Lille Marked".

- Det blir mykje gode ostar og kvalitetsvarer. Men målet er ikkje kun å selje dyre delikatessar. Like viktig blir det å skape ein ny og triveleg samlingsplass for folk, der ein kan stikke innom og nye kvalitetskaffi, til dømes. Eg meiner både beliggenheita og lokalet er perfekt for dette, seier ho.

Det nye konseptet kjem også til å satse på lukka selskap og på cateringtilbod.

I løpet av hektiske sommarveker har det skjedd mykje i det gamle parfymerilokalet. Etter pålegg frå Arbeidstilsynet er det bygt handikaptoalett, og det er laga ny nødutgang. No ventar Kroppan på serveringsløyve og på svar frå Flora kommune på søknaden om løyve til skjenkjing.

Når det gjeld bemanning kjem Gitte Kroppan til å gå forsiktig ut.

- Eg har ein mann som driv to restaurantar i Bergen som vil avlaste meg innimellom, i tillegg har eg sikra ei laurdagshjelp. Utover det blir det eigeninnsats. Eg skulle også ønskt å tilsetje ein person til i halv stilling. Det ville frigjere tid for meg til å lage eigene brød og bakevarer, men det får vi sjå på etter kvart, seier ho.