22. juli skal dei som vart direkte råka av terroren på Utøya samlast på øya for ei markering. Men det er ikkje berre dei overlevande og pårørande som føler behov for å samlast til ettertanke. Terroråtaket ramma ein heil nasjon.

– Det er mange av oss som har behov for å møtes på søndag. For vi vart alle råka den dagen i fjor. Vi treng alle ein plass å gå, seier Karianne Torvanger (Ap). Ho er ei av initiativtakarane til samlinga på torget.

Programmet

Under markeringa vil tidlegare ungdomsordførar Erlend Bøe frå Unge Høgre halde ein appell.

– Både eg og Karianne merkjer at dei gode verdiane i samfunnet har blitt styrkja etter 22. juli; både ytringsfridommen, samhaldet og engasjementet, seier han.

Arrangementet byrjar klokka 17.00 og er forventa å vare ein time. Haffen vil vere open for dei som vil setje seg ned og ta ein prat.

- Alle er i same båt

Under arrangementet søndag skal ungdomspolitikarane i Flora setje handavtrykka sine på eit banner, for å markere at vi alle er i same båt, uansett parti.

Etter arrangementet vil det bli servert gratis kaffi, vaflar og kake på Haffen, og inne vil den nasjonale markeringa i Oslo visast på ein TV-skjerm.

Her kan du sjå sendinga frå den nasjonale minneseremonien 21.08.2011 i Oslo.