Henning Haugholt i grendelaget fortel at dei i år går for pirat-tema.

– Vi håpar folk vil komme utkledde som sjørøvarar, og vi vil vere behjelpelege med ansiktsmåling til dei små piratane - ja, til dei store og, for den del, seier Haugholt.

Lokal utfordrar

Fiskekonkurransen opererar som vanleg med fire klassar: Den største fisken, den største fangsten (totalt antal kilo), flest fisk (antal) og den mest originale fisken. Ein har to og ein halv time på seg frå klokka tre og framover til å bokstaveleg talt hale i land sigeren.

Magne Svardahl i grendelaget har tidlegare gjort det godt og raska med seg fleire premiar i konkurransen.

– Han kan bli hard å slå, han er skikkeleg på hogget i år, sler Haugholt fast.

Men også damene har gjort det bra i denne fiskekonkurransen – i 2010 var det faktisk damene som stakk av med samtlege premiar. Det har askrovingane ingenting i mot – faktisk er dei ikkje verre på det enn at dei stryk påmeldingsavgifta dersom det kjem reine «damebåtar» og melder seg på. Og skulle det vere slik at du manglar båt, men har lyst å vere med og fiske, fiksar dei det og. Men då må du gi beskjed til anten Haugholt eller Terje Svardahl.

Vaksne sjørøvarar

Men det vert også aktivitetar på land utover dagen, hovudsakleg for ungane. Eliasbåten kjem sjølvsagt, og som tidlegare nemnt vil det vere mogleg å få den rette piratlooken om ein kjem utkledd.

Det vert også sal av fiskesuppe laga på lokale rå-varer, grillmat og forfriskningar av ulikt slag. Om kvelden er det tid for å slå seg laus med fiskeskrøner for piratane på Krisen Kro. Her vil det bli delt ut premie for beste mannlege og kvinnelege pirat, og sjørøvarane og -røvarinnene kan svinge seg til lokal DJ.

Haugholt håpar på mange deltakarar, og har ei viktig oppfordring til sist:

– Hugs at også sjørøvarar bør vise sjøvett og bruke redningsvest på sjøen!

Det er i år åttande gong at fiskekonkurransen vert arrangert, og bygdelaget ser på den som viktig, både for lokalbefolkninga og for å få vist fram øya si for tilreisande og turistar.