I helga vil festivaldeltakarane kunne få med seg vakre tonar frå Jonas Fjeld Duo, Mike Anderson Band og Frode Alnæs.

På fredag opnar Havly dørene for konsert med Mike Anderson Band frå Danmark. Monica Hauge samanliknar bandet med den kjende norske artisten Jarle Bernhoft.

- Dei spelar ein Bernhoft-aktig soulmusikk. Utruleg fengjande og vakkert, seier Hauge.

Neste på plakaten er familiekonsert med Jonas Fjeld laurdag ettermiddag. Tradisjonelt sett har ettermiddagskonserten på grillinga bak Havly vore prega av lokale artistar.

- Det nye i år er at Jonas Fjeld vert med og underheldt under grillinga, etter at dei lokale artistane har vore på scena. Dette er eit arrangement som passar for folk i alle aldrar, seier ho.

Det er nok billettar igjen førebels.

- Vi er ganske sikre på at laurdagen vert raskt utseld, og eg er i tvil om det kjem til å vere billettar att ved døra i helga. Difor oppmodar vi til å kjøpe på førehand. Helgepassa forsvann rimeleg fort, seier ho.