Onsdag sende ordføraren ein e-post til Høgre, Arbeidarpartiet og Senterpartiet sine fylkesrepresentantar på Stortinget, med ei heilhjarta bøn om draghjelp. Målet er å få Statnett til å justere traseen for linja slik at den i størst mogleg grad sparer innbyggjarane i Eikefjord og på Storebru.

- Eg har full forståing for at innbyggjarane på Storebru er fortvila, men dei må skyte på dei som har ansvaret. Det er ikkje Flora kommune som har ansvaret her, seier ordførar Bengt Solheim-Olsen (H) etter at Firdaposten tysdag skreiv om dei familiane som må flytte frå gardane dei har budd på i generasjonar grunna 420 kV-linja. Dei meiner det nye bystyret har gjort for lite.

Til svar viser ordføraren fram ein solid bunke brev og referat frå møter med både Statnett og Olje- og energidepartementet (OED). Gjennom fleire brev, det siste til Statnett datert 3. juli, har kommunen forsøkt å få endra trasevalet, utan at dei har vore lydhøyr for innspela.

I tillegg har stortingsrepresentant Bjørn Lødemel (H) også teke dette opp direkte i spørjetimen.

Men ministeren er urokkeleg. Trass i tilrådinga frå kommunen, fylket, Statnett og NVE, står Ola Borten Moe fast på at linja skal liggje der han har bestemt. Dermed står vedtaket fast.

Flora-ordføraren godtek at linja må gå gjennom kommunen ein eller annan stad. Men det må vere rom for justeringar, poengterer han.