Grunnlaget er at utsleppa frå produksjonen har ureina miljøet, sidan produksjonen har lege 70 prosent over det dei har løyve til.

Haukå Setjefiskanlegg har utsleppsløyve frå Fylkesmannen i Sogn og Fjordane for utslepp frå produksjon av 236 tonn fiskebiomasse. Fylkesmannen meiner verksemda sidan 2008 har produsert opptil 400 tonn årleg, noko som er nesten 70 % meir enn tillate. Produksjonen har ført til negative miljøverknadar på sjøbotnen.

Fylkesmannen meiner det er kritisk viktig at verksemder med ureinande utslepp har respekt for rammer og vilkår i utsleppsløyvet.

I utgangspunktet set ureiningslova forbod mot å ureine. Løyve til utslepp er difor resultatet av ei vurdering av verksemda sine behov, miljøet sitt krav mot påverknad, nødvendige utsleppsreduserande krav og kostnadar med tiltak. Våre krav vert vurdert ut frå generelle prinsipp som t.d. føre var - omsyn, kva kan ein oppnå ved bruk av beste tilgjengelege teknikkar og om utsleppet vil gå ut over trivselen til folk eller skade naturmiljøet. Mogelege krav må også vurderast mot totale kostnader og om kravet er pårekneleg for slik verksemd. Dei grundige avvegingane som ligg til grunn for eit løyve til utslepp, er blant årsakene til at brot på vilkår i eit løyve er straffbart.