Over heile landet dukkar nye firma opp som paddehattar. Så også i Flora og Bremanger. Berre i første kvartal av 2012 vart 22 selskap etablert i Florø, og så mange som sju selskap i Bremanger. Fleire kvinner blir dessutan gründerar bak eiga bedrift.

Ei av dei som har valt å ta dette store steget og realisere draumen om eiga bedrift er Gitte Kathrine Kroppan Villand. I mai etablerte ho selskapet Lille Marked AS.

– Eg tenkjer på Lille Marked som ein butikk for «det gode liv», slik som dei små delikatessebutikkane i Frankrike og Italia. Eg ønskjer å skape ein stad med gode lukter av ostar og kjøtvarer frå Middelhavet – i tillegg til å få fram alt det gode vi har av lokale råvarer i fylket. Her skal kundane også få smake dei ulike varene før dei kjøper dei, smiler Villand.

Lille Marked skal liggje i Strandgata 39, der oppussingsarbeidet alt er i gang. Opninga av Florø sin eigen ferskvare- og delikatessebutikk med uteservering skal etter planen vere i august.

I løpet av første kvartal 2012 vart det etablert sju mindre selskap i Flora kommune samanlikna med same periode i fjor. I Bremanger vart det derimot oppretta to fleire selskap enn i fjor.

– Dette kan det vere mange grunnar til, men mitt håp er at det kommunale næringsfondet kan vere med å bidra til ei auke. Det er ting på gang i Flora no, så når vi kjem ut i august er nok situasjonen ein heilt annan, seier Bareksten.

Bareksten har hovudansvaret for næringsutvikling i Fram Flora. I tillegg til å bidra økonomisk, gjev ho også råd og vegleiing.

– Vi kan hjelpe nyetablerarar på mange felt, ikkje berre økonomisk. Det er berre å ta kontakt med oss, seier Bareksten.