Færre unge menneske klarer å skaffe seg eigen bustad i dag enn for eit år sidan. Dette er konklusjonen til Sparebanken Sogn og Fjordane etter at styresmaktene innførte strengare krav til eigenkapital.

-Så langt i år er utlånsveksten i aldersgruppa 20 til 35 år halvvert frå seks til tre prosent. Vi er temmeleg sikre på at hovudgrunnen er at kravet frå Finanstilsynet om 15 prosent eigenkapital ved kjøp av bustad er svært vanskeleg å klare for mange, seier direktør for Privatmarknad i Sparebanken Sogn og Fjordane, Hallvard Klakegg i ei pressemelding.

Dei nye eigenkapitalkrava gjer at du må ta 300 000 kroner frå eigen lomme dersom du skal kjøpe ei leilegheit til 2 mill. kroner. I ein fase der du er nyutdanna, eller nettopp byrja i din første jobb, er dette eit urealistisk beløp for dei aller fleste. Redninga blir ofte foreldra.

– Vi ser at mange foreldre er flinke til å stille opp med eigenkapital eller kausjonsansvar for å hjelpe barna inn i bustadmarknaden. Baksida av dette er at vi etter kvart kan oppleve eit klasseskilje mellom dei som har foreldre som kan stille opp og hjelpe og dei som ikkje har det, seier Klakegg.