Heine Totland og Arne Hjeltnes strøymer over av lovord om distriktet og produkta dei har fått smake her. Dei kom opprinneleg for å lage eit innslag om Svanøy Røykeri, men fann ut at dei også måtte ha med Hjortesenteret - og Kinn Bryggeri.

– Med den naturen, den maten, det vêret de spadde opp i går, kunne vi laga ein heil serie berre om distriktet her, seier Heine Totland. På Svanøy budde dei på Hovudgarden og fekk sjølvsagt servert hjort og laks.

Hjeltnes framhevar kor viktig det er med patriotisme når ein har gode produkter lokalt:

– Butikkane her må føre Kinn-ølet og ikkje Carlsberg. Reiselivsnæringa må og støtte dette ved at dei tilbyr dei lokale produkta til turistar. Det er mykje kjekkare å komme heim og sei at «eg fekk smake eit fantastisk lokalt øl». Det er veldig moro å komme hit og sjå at Espen brygger godt øl med armar og bein, seier han.

For Espen Lothe på Kinn Bryggeri er svært nøgd med profileringa deltaking i dette programmet gjev han, sjølv om han allereie produserer for fullt i dei trange lokala sine.

– Ja, dette er utruleg kjekt, det er jo vanvittig bra profilering, og det er sjølvsagt kjekt å bli sett pris på. No må vi berre komme oss inn i dei nye lokala og brygge på harde livet, seier Lothe.

Han legg til at bryggarutstyret dei skal bruke der har byrja å komme, så dei vil vere klare til å starte opp så snart bygget står klart. Og det kjem vel med, for han har aldri nok øl til å dekkje etterspurnaden.

Totland seier han lenge har vore fan av Kinn-ølet og karane fortel at dei har kjøpt kassevis av øl med seg heim.

– No skal vi heim og forføre konene våre med Kinn Rosa! seier dei leande.