Viser til sak om kjøp av sjukehuseigedommen i Florø og avtale med Helse Førde.

Det er viktig å halde seg til realiteten i saker, noko du heilt tydeleg ikkje gjer her.

Arbeidarpartiet har invitert til samarbeid, men den invitasjonen tok du ikkje imot. I staden går du til angrep på oss og legg skulda på AP om avtalen med Helse Førde ikkje går igjennom politisk.

Til NRK fredag 8.6.12 uttalte du at AP har ikkje teke inn over seg at det er Høgre som styrer.

Kva er då problemet ditt?

Jau, det kan eg hjelpe deg med å finne ut.

Høgre styrer ikkje aleine, de styrer i lag med Venstre. Det er ikkje Arbeidarpartiet som har ansvaret om de har samarbeidsproblem.

AP kom med eit nytt framlegg til vedtak i sjukehussaka som vart støtta av Venstre. Alternativet var at saka vart stogga.

Så til påstanden din i NRK om at forrige intensjonsavtale var så dårleg og at vi prøvde å tvinge den igjennom. Begge deler er feil.

Avtalen vart samrøystes vedteken i bystyret og signert av partane 17.11.2009. Treng du meir oppdatering kan du ta kontakt med din partifelle Odd Husebø og tidlegare gruppeleiar i Høgre Berit Seljeseth Osa som var med i arbeidet med å få den på plass.

Grunnen til at det ikkje vart kjøp av sjukehuset då var at etter avtalen var godkjend ville HF ha den endra til og å gjelde framleige, men det sa bystyret nei til, også det var samrøystes.

Vi arbeidde ilag og var opptekne av å finne løysing.

Du har fortsatt høve til å ha oss med, om du vil.

Bolstad svarte på møte med gruppeleiarane, etter spørsmål frå meg, at det ikkje var eit problem om vi trengte litt lenger tid, eg nemnde 2-3 veker.

Etter å ha arbeidd med denne avtalen bak lukka dører i eit halvt år utan ein gang å informere samarbeidspartiet ditt så kan det vel ikkje vere så vanskeleg å forstå at andre ber om litt tid for å få svar på sine spørsmål.

Så Bengt Solheim-Olsen, det er opp til deg om du ynskjer at vi skal få til noko her.

Bente Frøyen Steindal

Gruppeleiar AP