Luftambulanse, ambulansebåt , brannvesen og politi rykte ut etter medling om trafikkuhell på fv 616 mellom Hauge og Ryland. Ambulansen som køyrde utfor vegen var på veg til ein pasient. Det var difor berre ein person i køyretøyet då ulykka inntraff. Det skal vere snakk om ei kvinne i 40-åra. Vedkommande vart send med luftambulanse til Førde sentralsjukehus.

Skadeomfanget er ikkje kjent.

Andreas Hamn og vennegjengen vart vitne til hendinga og fortel at ambulansen først køyrde i ein fjellvegg før den rulla utfor ein kant, ca. 30-40 meter før den stoppa.

Hendinga fann stad like før halv elleve torsdag kveld, like ved Løvikneset i følgje vitna.

-Eg, Martin Viken og Marcus Nyttingnes, sto og såg over på andre sida, då vi høryde eit smell. Så såg vi ambulansen rulla ned ca. 20 meter. Det første vi gjorde var å ringe 113, fortel Andreas Hamn. Han og vennegjengen blei bedt av operasjonssentralen om å springe til for å sjå korleis det hadde gått, men det tok så lang tid at dei måtte få naboar til å køyre seg.

- Då vi kom fram sto det allereie to bilar der frå før. Folka var nede med ambulansen og sa dei hadde det under kontroll og ba oss om å trekkje unna, fortel Hamn og seier dei tydeleg kunne sjå bulkar framme på køyretøyet. Vrakdelar frå ambulansen låg att på vegbana.

Like etter kom det luftambulansar og brannbilar til ulykkestaden. Ulykka skal ikkje ha fått konsekvensar for pasienten som skulle hentast.

Ulykka vert etterforska av Bremanger lensmannskontor.