Neste veke går Forskarforbundet til streik dersom fagforeininga ikkje får innfridd krava sine i lønsforhandlingane gjennom hovudorganisasjonen Unio, melder forskerforum.no. Dei sit no i meklingar med staten hos Riksmeklaren og har frist på seg til midnatt onsdag 23. mai til å komme i hamn med forhandlingane. Greier dei ikkje det, vil mellom andre metereologane bli tekne ut i streik.

I første omgang vil streiken ramme vêrvarslinga for Vestlandet og kysten utanfor, som vert produsert ved Meterologisk Institutt i Bergen.

- Folk vil merke at det ikkje vert produsert noko vêrvarsel for Vestlandet ved at det ikkje vert symbol på kartet og ingen tekstar på Yr for Vestlandet eller bankane utanfor i den perioden det er streik. Det einaste som vil gå ut, er noko vi kallar "liv og verdiar", som er ei beredskapsteneste ved kuling og storm, men ikkje vanleg vêrvarsling, seier Terje Alsvik Walløe, statsmetereolog og leiar av Forskarforbundet sitt lokallag ved Metereologisk Institutt i Oslo.

Han legg til at det einaste som vil verte varsla under ei eventuell streik, er farleg vêr.

Dersom ei slik streik dreg ut og vert trappa opp, kan det innebere at Metereologisk Instiutt si Oslo-avdeling vert teken ut. Då vil vêrmeldingane i NRK forsvinne heilt.