Det vart klart etter Flora SU sitt årsmøte 16. februar. Samstundes vart det valt nytt styre.

Blir spanande

Og Eide Onstad gler seg til å ta over leiarrolla.

Eg synest det blir veldig spanande å ta over i Sosialistisk ungdom. Det er eit stort ansvar, men det blir veldig gøy. Vi er ein fin gjeng, seier Mona Eide Onstad.

Og ho tek over eit ungdomsparti som engasjerer fleire og fleire unge.

Vi har vore nede ei stund når det gjeld medlemstalet, men etter valkampen verkar det som om fleire og fleire har lyst til å bli med, seier Onstad.

Ved kvart møte dukkar det gjennomsnittleg opp mellom åtte og ni medlemmer, men det er likevel ikkje det største ungdomspartiet i Flora. For til ulikskap frå mesteparten av ungdomspartia i fylket gjekk medlemstalet i SU, fylket sett under eitt, nedafrå 69 i 2010 til 65 etter valet i 2011.

Aktivt ungdomsparti

Lokallaget i Flora vart skipa for tre år sidan. Men om det framleis ikkje er av dei større partia i buketten av lokalungdomsparti, er Flora SU ein av dei mest aktive og fargerike.

I 2011 la lokallaget ned mykje i antirasistisk arbeid, og arrangerte mellom anna fakkeltoget 9. november som markerte krystallnatta. Vel 80 personar deltok på denne marsjen gjennom gatene i Florø. No står 8. mars-markeringa for døra, før 1. mai-markeringa.

Og Eide Onstad lovar å halde aktivitetsnivået oppe.

Vi har hatt godt med aktivitet i 2011. På den måten får vi fleire unge til å engasjere seg, seier Eide Onstad.

Men ho tek ikkje på seg denne jobben åleine. Med seg i styret har ho nestleiar Susanne Odijk Solbakken, Eivind Lystad, Eivind Andreas Standal Moen og Olav Anders Totland.