Nysnøen avslørte nøyaktig kor personen som gjorde herværk ved å knuse ei glasrute natt til torsdag, tok vegen etterpå.

Det var faktisk berre eitt einaste spor i snøen gjennom Florø sentrum. Og det kunne politiet lett følgje etter at dei fekk melding om ruteknusinga klokka 02.15.

Vi fekk melding om at det var komen ein stein inn gjennom soveromsglaset til ein kar. Men det var ikkje folk i soverommet då steinen på storleik med ein fotball dundra gjennom ruta, sa operasjonsleiar ved Sogn og Fjordane politidistrikt, Einar Vereide.

Det vesle brotsverket kan sjå ut til enten å vere utført i beste Agatha Christie-stil eller i «nedsnødd» mental tilstand. Spora leia inn til ein slags labyrint, eit hybelhus, der det viste seg å vere ressurskrevjande for politiet å finne ut kven den skuldige var.

Vi har ikkje kunna prioritere denne etterforskinga, vedgår politistasjonssjef Robert Veseth.

Sidan det her ikkje var personskade, så er dette definert som eit reint skadeverk, understrekar han.