Laurdag var det duka for zumbathon i Florahallen og 92 personar stilte opp for å danse for ei god sak. Foruten kostnader for leige av hall og annonsering går pengane frå inngangsbillettane direkte til Den Norske Kreftforening.

- Det er veldig overveldande. Eg hadde ikkje trudd det skulle komme så mange, smiler instruktør Jeanne Kjerpeseth.

Saman med tre andre zumbainstruktørar frå Bremanger og Florø sto ho bak den fire timar lange zumbathonen.

Det heile kom i gang etter at ein av deltakarane frå Jeannes zumbatimar fekk kreft.

- Ho inspirerte meg til å gjennomføre dette, seier Kjerpeseth og held fram:

- Det er så mange som får denne sjukdommen. Det minste vi kan gjere er å hjelpe litt til.

-Er det ikkje slitsomt å trene Zumba fire timar i strekk?

- Nei, det er det som er så bra med Zumba, du gløymer at du trenar, smiler Judith Ekerhovd , ein av instruktørane frå Bremanger som tok turen til Florø for å leie zumbathonen.

- Zumba er berre heilt herleg, og så passar det for folk i alle aldre, kjem det frå Charlotte Skjølberg som knapt klara å stå i ro når musikken ljomar ut i frå høgtalarane.