- Ein leitar etter ord i slike samanhengar. Ein vert sett ut, blir oppgitt og innser at det ikkje er noko ein kan gjere, seier eigar Oddvar Færøyvik til NRK.

Han fekk melding klokka 5 om at hovudhuset stod i brann.

Han kom til staden like etter at han fekk telefonen om brannen, men måtte stå hjelpelaus og sjå at flammane åt opp huset. Brannvesenet konsentrerte seg om berge ei sjøbu ved sidan av, men hovudhuset var ikkje til å berge.

Brannvesenet rykte ut klokka 04.55, men då dei kom fram var hovudhuset allereie overtent og delvis rast saman.

– Vi prioriterte difor å begrense spreiinga til naust og vegetasjonen rundt. Likevel greidde brannen å spreie seg til eit lite uthus attmed hovudhuset.

Det seier Trygve Andersen, vakthavande befal ved Flora brannvesen til Firdaposten.

Dronning Sonja var nyleg på besøk i jubileumsbyen og nettopp Furesundet Handelsstad var ein bygning og eit område ho oppmoda særkilt om at ein måtte ta vare på.

Då vi kom til brannstaden torsdag føremiddag var politiet på plass for å sikre at folk ikkje gjekk inn i branntomta.

- Branntekniske undersøkingar startar først når tomta er utbrent, seier politibetjent Kåre Toreid.