Sjølve markeringa gjekk føre seg på Notavollen, like nedanfor Norddal kyrkje i Norddalsfjorden. Og det var ein glad og stolt Jostein Midtbø som no kunne sjå attende på fem år med registrering, løypemerking og stigrydding. Eit arbeid som har ført fram til boka «Ferdslevegar i fjella mellom Norddalsfjord, Hyen og Eikefjord».

– Det å kunne gjenopne dei gamle stigane betyr veldig mykje for oss. Det er masse kulturhistorie i dei tråkka stigane som går mellom bygdene, seier Midtbø og understrekar:

– Denne historia må vi ikkje gløyme, av respekt for dei som har gått desse stigane, seier han.

Løypenettet som no går mellom Hyen og Norddal er på 40 kilometer. I alt har så mange som 40 til 50 personar delteke i ryddingsarbeidet.