Ulukka skjedde på Grov natt til torsdag 1. januar 2009.

I svært alkoholpåverka tilstand let føraren i byrjinga av 20-åra bilen gå over i motsett køyrebane, der den kolliderte med ein møtande bil.

Føraren av ulukkesbilen og dei to passasjerane i den møtande bilen vart alvorleg skadde i ulukka. Passasjeren i den møtande bilen fekk ved Haukeland universitetssjukehus påvist brot i ryggvirvelen, bekkenet og begge lårbein, i tillegg til knusingsskade i begge leggene og det venstre hælbeinet.

I retten seier passasjeren at ulukka og skadane har medført at evna hans til livsutfalding og livskvalitet er redusert. I tillegg slit han framleis med sterke smerter.

I Fjordane tingrett sa 20-åringen seg skuldig etter tiltalen. Dette fann retten som formildande. Retten fann det likevel skjerpande at mannen så seint som i 2005 vart dømd for å ha kollidert i alkoholpåverka tilstand, samt køyring utan førarkort. Aktor la difor ned påstand om at mannen skulle misse førarretten for alltid.

Dette var Fjordane tingrett samd i, og dømde mannen til å misse førarretten for alltid i tillegg til seks månaders fengsel, to av desse med atterhald og med ei prøvetid på to år. Mannen må også betale ei bot på 6000 kroner.