Ut frå korleis båten står plassert, må den ha hatt god fart då den kom heilt ut av kurs og enda på tørre landet på Tansøy, øya sør om Askrova ved innseglinga til kaia på Askrova.

Hovudredningssentralen fekk melding om ulykka klokka 7.47. Eit mannskap på tre og fem passasjerar var ombord og ingen vart skadde. Hovudredningssentralen fekk melding om at båten ikkje trengde assistanse.

Passasjerane vart frakta til Florø med ein annan båtskyss i dag tidleg. Det er allereie sett inn ekstra båtrute som skal erstatte "Vetlefjord" på den søre ruta i florabassenget.

Fjord 1 har oppretta ei eiga gruppe som skal handtere situasjonen. Ifølgje Fjord 1 skal det ikkje vere fare for lekkasje frå båten, sjølv om det er registrert eit hol i ytre skrog på styrbord side på fartøyet.

Fjord 1 melder at dei vil trekkje båten av grunn ved 14-tida i dag, på flo sjø. Kva som er årsaka til grunnstøytinga er førebels uklart.