Til neste sommer planlegg ho å setje opp eit akvarium i Florø. Eit «lite» byakvarium på 20 000 liter midt i sentrum, til glede for florøfolk og besøkjande.

– For meg var det eIt løft då Elin Tveit Sveen frå Marø Havbruk fortalte at ho og seks andre oppdrettarar hadde lyst å støtte meg. Det er kring sju år sidan ideen dukka opp. Målet var å finansiere det uten å ta opp lån. Det vi får av billettinntekter skal gå til å stelle akvariet og til å bygge utstillingar. Med denne støtta på kr 375 000,- nærmar vi oss fullfinansiering på vel 1,7 millioner, fortel Landøy.

Akvariet vil bli som ein stor dam med sandbotn og tareskog. Det vil innehalde eit stort mangfald av fisk og sjødyr.. Samstundes ønskjer Landøy å ha utstillingar og presentasjonar av ulike tema som havet, biologisk mangfald og til å fortelje om korleis havbruksnæringa brukar leppefisk til å halde oppdrettslaksen fri for lakselus.

– Både laks, lakselus og leppefisk er ein del av det naturlege biologiske mangfaldet. I akvariet skal vi ha fleire artar av leppefisk samt laks og sjøaure, fortel Landøy, som er glad for å ha lokale havbrukarar som støttespelarar.

Dei har kunnskapar om fiskehelse og vasskvalitet som ho kan dra nytte av.